Psaumes 68 - Ma Zhiklè

¹ Psaume David. Dimèsh.

² Bi Zhiklè a slèmbèɗè. Mayamhi nengaʼa ta hi ta. Tengaʼa man ta gi shèwa a nengaʼa ta hi ta auda a sam na.

³ Ara vodzok man kozlar a vindèʼa, ara dazli vongwom man vogwa a wyamaʼa, ndohi ambaɓihiaʼa ta ndev ta a sam di Bi Zhiklè.

⁴ Aman ndohi nzuraʼa ta wuffè, ta gi langlangaʼa a sam di Bi Zhiklè, ta sli dimèsh mwuffè.

⁵ Va-sla na dimèsh a Bi Zhiklè, va-tsu ganzavar a géɗ nzlembaɗ nengaʼa! Va-tila na civèɗ a nengaʼa man a dè tʼhèshèkèɗ! Va-wuffa a géɗ Ndo nzi pèc pècèk, va-slu dimèsh a ma nengaʼa!

⁶ Bi Zhiklè, nengaʼa bab wud dikai, man a nza ta deɓa a ngwozi mazihai te kita, a sam nʼnzi nengaʼa nkezlaʼa.

⁷ Bi Zhiklè a va ta gai a mbelaw ndohai, a preka ta ndohi dangai auda. Sèi ndohi mèdègèɗ ta nza a ta ngècè skwi azɓai.

⁸ Bi Zhiklè, aman ko do a ma ndohi ngaya, aman ko do tʼhèshèkèɗ,

⁹ herkeda a ngudzau, giɗfèk ncizl na a sam di Bi Zhiklè, te Sinai, a sam di Bi Zhiklè, Zhiklè Israel.

¹⁰ Bi Zhiklè, ka pshè ta ma kumba a ndohi Israel, ndohi nʼndi gi ngaya. Aman iyam a gworama ta ndav, ka nzlünda ta iyam.

¹¹ Nhèyè-va ndohi ngaya ta ngots sam nʼnzi a pa, man ka, Bi Zhiklè, ka tila ta a mbelawhai a géɗ ngiamba ngaya.

¹² Bai, Zhiklè, a bèhè; ngwozihi kumba ta shèwèldè ma mbelaʼa:

¹³ Bihi var ta hi ta, ta hi ta, a mamgai a kezli skwi ɓèlè.

¹⁴ Kelpasl nkudhom mʼmbè te pa a verzhègenè, a gwotsaʼa a nkokuri kra ara guro.

¹⁵ Aman Bi Zhiklè wuɗai a dzam ta bihi te pa, vandzal a ngau a Salmon.

¹⁶ Za Basan, za Zhiklè. Za Basan, a gèɗ tsultsultsulaʼa.

¹⁷ Kin zahai, kinè a gèɗ tsultsultsulaʼa, kin gi srak a géɗ za man Bi Zhiklè a woyaʼa a sam nʼnzi na, man Bi Zhiklè a da nzi a pa a mèdèp, èhèmè?

¹⁸ Kiki var Bi Zhiklè a zhè kumba, ta gi gozhèm kumba kumba. Bai, Zhiklè, a shkè te Sinai, a dè a sam nengaʼa nkezlaʼa a vna.

¹⁹ Ko do a géɗèʼa, a ka hel ta ndohi ndzawaʼa a verzi ngaya, a ka ngots ndohi man ta pa ka. Ko ndohi man ta woya ɓai, anai sèi ta nzi a sam Bi Zhiklè.

²⁰ Ngo-shüdokoy gèɗ a Bai, Zhiklè, pèc pècèk! Zhiklè a takaha nga, a mbel nga.

²¹ Zhiklè nga, Zhiklè nʼngul skwai. Bai Ndo nzi pèc pècèk a mbel nga te ri mʼmetsai.

²² Halau, Bi Zhiklè, a batsama ta gèɗ a mayamhi nengaʼa, a batsama na vatasl gèɗ a ndo man a keɗa ndo.

²³ Bai, Zhiklè, a gaɗa: I ckoɗa deɓa a ngwai te Basan, i ckoɗauda tʼhwaɗ iyam mbiaʼa,

²⁴ a ka pènè sak ngaya te va pombaz, a nèʼèn kdadihai ta nèkèɗè man a mayamhai.

²⁵ Bi Zhiklè, ta rka ndè-ndè bi ngaya, ndè-ndè bi Zhiklè ga, bi ga, a sam nkezlaʼa.

²⁶ Ndohi dimèsh a ma, ndohi ganzavar te deɓa, te va dalahai man ta gècèdè dakocèr.

²⁷ Kinè man kin te verzi Israel, vo-slubordo Bi Zhiklè, Bai, a sam mɓicè va!

²⁸ Benjamin, ntabawaʼa, a shkè a ma, bihi Juda a maslaka bi a va, a bihi Zabulon, a bihi Nephthali.

²⁹ Bi Zhiklè, gau a wuɗi-bi ngaya! Ngreda wuɗi ngaya, man ka takaha nga a vna,

³⁰ te gi Zhiklè ngaya te Jérusalem, a sam man bihi ta voko ka skwai.

³¹ Guvo skwi te va gozlolo, rèwè marihi ngaya, tsuvom ndohai, aman ndohi man var ambaha ta, ta gi ɓèlè, a maslaka verzhègenè a guro a va!

³² Ndohi mbibihiaʼa ta da shkè te Egypte a mbar man ta fèɗè a va. Ndohi Ethiopie ta da vi skwi ta langa a Bi Zhiklè.

³³ Kin kokwar bihi a géɗ herkeda, va-sla na dimèsh a Bi Zhiklè, va-tsau ganzavar a Bai!

³⁴ A nengaʼa man a nzi a mèdèp, nte zhiklè te géɗèʼa. Na haha a bèhè adaʼai mbiaʼa.

³⁵ Va-sun wuɗi Bi Zhiklè! Nengaʼa a gi bai a géɗ Israel, a wuɗi nengaʼa a zhè te va vanai.

³⁶ Bi Zhiklè, wuɗitpa a sam nengaʼa nkezlaʼa; nengaʼa Zhiklè Israel, man a vi wuɗai a ndohai, a nzal ta. Ngo-shüdokoy gèɗ a Bi Zhiklè!