Psaumes 66 - Ma Zhiklè

¹ Dimèsh. Psaume. Herkeda tèlèba, vo-slubordo Bi Zhiklè!

² Va-slu dimèsh nʼnjèl nzlembaɗ nengaʼa, va-shüd gèɗ, a nʼnjèl nengaʼa mbiaʼa.

³ Va-gaɗa na Bi Zhiklè: Skwi man ka giaʼa, wuɗitpa! Mayamhi ngaya ta slebarde ka, a géɗ wuɗi ngaya mbiaʼa.

⁴ Herkeda tèlèba da gurɓahai a sam ngaya, da slebarde ka, da sla ka dimèsh!

⁵ Vo-washkè, va-war skwi man Bi Zhiklè a giaʼa, man a gi skwi mwuɗitpa a sam ndohi herkeda.

⁶ A nʼngwode iyam mbiaʼa a herkeda nʼngworaʼa. Ta beza a pa a sak. Ngo-wuffokoya a géɗ nengaʼa!

⁷ A wuɗi nengaʼa a gi bai a mèdèp. Di nengaʼa a wèr ndohi herkeda. A va ta civèɗ a ndohi mèdègèɗ a ta gi ma azɓai.

⁸ Kin ndohi herkeda, vo-slubordo Zhiklè nga, dimèsh nshid gèɗ a nengaʼa da tsen dra!

⁹ Nengaʼa man a va nga nshèffè te ndav, a ɓer sak nga aman a dè fed na.

¹⁰ Bi Zhiklè, ka jkede nga, ka wosl nga ara man ta wèsl verzhègenè.

¹¹ Ka gs nga a gadda, ka pra nga zlau a va,

¹² ka proko nga ndohi ngiɗè a gèɗ, nga beza a sak a ndev vogwa, a ndev iyam, aman ka hel nga auda a dala.

¹³ I dè a gi ngaya a i ndara ka skwai, a i dagi ara man i gaɗa ka ma a hai,

¹⁴ man a shkè auda te tapiɗaf ma ga, man i goɗ te ma ga a pats matakwan.

¹⁵ I da ndara ka skwi ngraʼa, a mbeza drok; i da zla ka marai a mazawalhai.

¹⁶ Vo-washkè, va-tsenamaga! Kin tèlèba man kin gi zlau Bi Zhiklè, i woy a i njè skwi man Zhiklè a gu te ndav ga.

¹⁷ I baha na a ma ga, i shida na gèɗ a nèʼèn ga.

¹⁸ Aman a matsa mali te ndav ga, ar Zhiklè a ntsena bai.

¹⁹ Aman a vava Bi Zhiklè a ntsenaʼa, a nfu zlembaɗ a ntsi ri ga,

²⁰ I shid gèɗ a Bi Zhiklè, man a nkwola ntsi ri ga bai, a mvay pombi genè.