Psaumes 65 - Ma Zhiklè

¹ Psaume David. Dimèsh.

² Bi Zhiklè, sèi ka, nga shid gèɗ a ka te Sion; a ndohi man ta gaɗda ma a hai, sèi ta gi ara man ta gaɗdahi a sam ngaya.

³ Ka cè ntsi rai. Ndohi tèlèba ta dè a sam ngaya.

⁴ Skwi man ambaɓai man nga giaʼa, man a fena wuɗi nga, mali nga, ka ka prèʼa.

⁵ Mwuffè a sam ndo man ka ngotskoɗauda a ka cèʼa, aman a da nzi te gala ngaya. Nga woy a nga ngècè mpshè ma te gi ngaya, a sam ngaya nkezlaʼa, a nga ngézhè a vna.

⁶ Ka Zhiklè man ka mbel nga, ka da mbeɗa nga a ma a skwi mbiaʼa man ka giaʼa te ngi-zuraʼa. Ndohi te verzi herkeda tèlèba ta pi ndav ta a ka, a herkeda dra man ta tsoko gèɗ auda te iyam, lèmèlèmè arsa.

⁷ Ka dizla za a wuɗi ngaya, ka dzawa deɓ ngaya a wuɗai.

⁸ Ka gi aman iyam tskuɗuf-tskuɗufaʼa a nzi géɓitèʼa; iyam tskuɗuf-tskuɗufaʼa ba, a nguzli ndohi herkeda ba;

⁹ ndohi man a géɗ herkeda ta rka nrkedi ngaya a ta gi zlau. Ka va ta mwuffè a herkeda te civèɗ mvèng pats, a herkeda te civèɗ nkèl pats.

¹⁰ Ka wara na di a herkeda, ka va na skwi kumba, ka pshè na ma. Nlèlè Zhiklè nʼndha a iyam, ka gi a dau a ngrè, ka til herkeda aranta.

¹¹ Ka ɓala na iyam a wurri gi dau, ka ndeda gari a hai, ka ruɓaʼa a iyam te zhiklè, a ka pshè na ma skwi man a fcè.

¹² A via ka ngreda ngiamba ngaya auda, mbar a hai a sam sak ngaya.

¹³ Ka ngwoda hèshèkèɗ a gi lak, mwuffè a zhè te za,

¹⁴ rèwè skwi a der za kwotataktakaʼa, dalbara mʼmbè te pa a dau sumbutoʼa, tèlèba ta gi wai, ta sli dimèsh.