Psaumes 64 - Ma Zhiklè

¹ Psaume David.

² Bi Zhiklè, tsena daʼai ga, aman i kuɗai. Ɓür nshèffè ga te ri zlau ndo ma-yam ga!

³ Ngheday va ga a sam ndohai man ta vhèy ma a gèɗ man ambaɓai, a sam mɓicè va ndohi malihai,

⁴ man a taslama ta ma ara gwèsh; ma tengaʼa a dèrè a pa ara sulom,

⁵ a ta ɓar ta ndohi man ta gi zlau Zhiklè, a ta nghaʼa; tsam-tsam-tsam ta bar ta, ta gi hori azɓai.

⁶ Ta peda va ta a wai a ngi skwi ambaɓiaʼa, ta gèɗè a va ta: Ngo-ngokoy ɓali a hai, a ta gaɗa: ndarka wa?

⁷ Ta hér ngi malai; a ta nghede skwi man ta woy a ta giaʼa; skwi man ndo a hèrèʼa a ndev ɓai.

⁸ Aman Bi Zhiklè a bar ta a sulom, a nasa nasa a nga ta mblè a va.

⁹ A gi aman ta kèlèhai, a géɗ ma tengaʼa. Tèlèba man ta rka ta, ta gidè gèɗ kwotakwotaʼa.

¹⁰ Ndohi tèlèba ta da gi zlau, a ta da njè skwi man Zhiklè a ngau, a ta sun verzi mizlinè nengaʼa.

¹¹ Ndo nzuraʼa a da wuffè a géɗ Ndo nzi pèc pècèk, a woy sam nlèaʼa a sam nengaʼa a ndohi a ndav nzuraʼa tèlèba ta da jégèr va a géɗ nengaʼa.