Psaumes 59 - Ma Zhiklè

¹ Dimesh mpi ndav a Zhiklè. Man a David, aman Saul a zlinde ta ndohi a ta tèuda gi man David te pa, a ta woy a ta keɗaʼa.

² Zhiklè ga, prekay auda te ri mayamhi ga, ɓeryè te ri ndohi man ta gay shèwa!

³ Prekay auda te ri ndohi mphomaʼa, ta-kahayè a sam ndohi nkeɗ ndo!

⁴ Na haha, ta woy a ta keɗyè, ndohi man wuɗi ta zhè ta humdokoy va a gèɗ, ko i ga skwi ambaɓia ɓai, ko i ga maharam ɓai, Ndo nzi pèc pècèk!

⁵ Ko i ga mali ɓai, ta hakaɗai, ta tila va. Slambaɗkada, washkè, a nga zli gèɗ a ka, a ka rkaʼa!

⁶ Ka Ndo nzi pèc pècèk, Bi Zhiklè bi mbiaʼa, ka Zhiklè Israel, slambaɗ ngaya a ka ngez ta ndohi herkeda tèlèba! Ndohi malihai da se ka te va ɓai!

⁷ A dakwaɗ a dakwaɗ ta shèwèlè te kokwar, a ta bkwè ara kdadihai.

⁸ Na haha, ta dérɗè ndo, ma tengaʼa ara tsakwal, ntsena ma tengaʼa wa?

⁹ Aman ka, Ndo nzi pèc pècèk, ka ngwoshè a gèɗ tengaʼa, ka liv ta ndohi herkeda tèlèba,

¹⁰ I pi di a ka, te man Bi Zhiklè ka wuɗi ga, nengaʼa gi ga ndakmaʼa.

¹¹ Zhiklè ga a da vay pombai; Bi Zhiklè a gi aman i ngwoshè a géɗ mayamhi ga.

¹² Ka bazl ta a metsar ɓai! Venda ta gèɗ a wuɗi ngaya, wushede ta a hai! Aman ndohi ga ta da rkaʼa, a skwi sa a pca ta a gèɗ azɓai.

¹³ Bi Zhiklè, ma tengaʼa nʼndha a malai, tapiɗaf ma tengaʼa a win-ko mali auda, nfi va tengaʼa da kalde ta a hai, a géɗ man ta dérɗè ndo a ta cèkèl ma.

¹⁴ Gedas ta a ndzoan, zede ta rè ba! A ta suna, Bi Zhiklè bai te kokwar Jacob, ha ndè a verzi herkeda.

¹⁵ A dakwaɗ a dakwaɗ ta shèwèlè te kokwar, a ta bkwè ara kdadihi zaʼa.

¹⁶ Ta hèsh skwi nʼndai, ta gi ndav man skwa a ngeza ta ɓai.

¹⁷ Aman iyè, i woy a i sli dimèsh a géɗ wuɗi ngaya, a prèk a prèk i wuffè a géɗ pombi ngaya. Aman ka gaʼa a gi ga ndakmaʼa, sam ga nlèaʼa, a pats matakwan ga.

¹⁸ I pi di a ka, te man Bi Zhiklè ka wuɗi ga, nengaʼa gi ga ndakmaʼa.