Psaumes 55 - Ma Zhiklè

¹ Dimèsh David.

² Wa Bi Zhiklè, tsena ntsi ri ga, ka ndè zlembaɗ man i kuɗi ɓai!

³ Tsena ma ga, mbeɗkay a ma! I zlèk ga a wobau a ma.

⁴ Nhèzlèwè mayamhi ga a patahay ma; ndohi ambaɓihiaʼa ta gay ma a va.

⁵ Ndav ga a mbeɗè, zlau mʼmetsai a keɗyè.

⁶ I gi zlau, i gudzai, a gay te va sawaʼa.

⁷ A i gaɗa: Nda ftsay kelpasl a va ara nkuɗhom, a i hi a sam man i shèk va a pa, wa?

⁸ Ar i hi ga dra, i da mènè a hèshèkèɗ.

⁹ Ar i ngècè sam man i nzi ɓarɓararaʼa, a kozlar a iyam a gay asaɓai.

¹⁰ Bai, Zhiklè, dzakaɓama ta nèʼèn! Aman i rkaʼa, ta gi shèwa, a ta bèzl va te kokwar.

¹¹ Ta tèuda kokwar a pa, a ta beza a géɗ zlazlar ko pats ko vaɗ. Skwi nzura ka ɓai, skwi ambaɓiaʼa tèlèba a gi a kokwaraʼa.

¹² Ngédèshè te ndevaʼa: ta gi a ndo, tacèkèlma a dal kokwar.

¹³ Ma-yam ga a nderɗyè ka ɓai – ar tsoi mènè – Ndo shèwa ga a nslambaɗkay a va ka ɓai – ar i nghédè va ga te riaʼa –

¹⁴ Aʼai, aman ka, gwoli ga, mandal ga, masli ga,

¹⁵ man nga nza a vna gedzagedzaʼa ngo do a gi Zhiklè a vna, a va mpi ndohi Zhiklè.

¹⁶ Mʼmetsai da kala ta va, do do a sam mʼmetsai a di tʼuda, te man shèwa te gi ta, te ndav ta.

¹⁷ I woy a i kuɗi a sam Bi Zhiklè, a Ndo nzi pèc pècèk a da mbelyè.

¹⁸ Ko a dakwaɗ, ko a prèk, ko a géɗ pats, i woy a i gi wobau a i ɗish va, Zhiklè a da tsena daʼai ga.

¹⁹ Nengaʼa a da vay nshèffè ga a sam ɓarɓararaʼa, ta slaha ta gay skwi ngiɗè azɓai, ko ta kumba man i ambaha ta ɓai.

²⁰ Zhiklè da tsenaʼa, da manda ta gèɗ a hai, nengaʼa man a zhè a sam nʼnzi bai tʼhinkaɗ na, te man ta ngwèdè ndav ta azɓai, ta gi zlau Bi Zhiklè azɓai.

²¹ Ndo mayam a cè ri a zhiklè a géɗ mandalahi na, a nderzlè-ma a mandal na mpraʼa.

²² Ma nengaʼa a hi ara iyam te woyam; aman te ndav nengaʼa a her shèwa. Ma nengaʼa ara mbar wa, njèkèm ɓai nara tsakwal nzlatsedaʼa.

²³ Skwi man a nzala ka a gèɗ, fedahi a gèɗ Ndo nzi pèc pècèk; nengaʼa a ngaka ka auda. Zhiklè a woy aman ndo nzuraʼa a sléfèɗè azɓi fèt.

²⁴ Aman ka, Bi Zhiklè, ka da zede ta a vèvèɗ nraʼa; ndohi nkeɗ ndo a ndohi nʼngwèdè ndo ta da bèzl ta te gola. Aman iyè, i pi ndav a ka.