Psaumes 50 - Ma Zhiklè

¹ Dimèsh Asaph. Zhiklè a géɗ zhiklèhai, Ndo nzi pèc pècèk, a gèɗè, a bèhè herkeda, a hinè te civèɗ mvèng pats, a ndè a civèɗ nkèl pats.

² Zhiklè a gudko va a dai ara skwi nhél sam te Sion.

³ Zhiklè nga a shkè, a nzi tètè azɓai, vogwa man a ndi skwai a dè a ma nengaʼa, ndombozlor a beza a tsagi nengaʼa.

⁴ A bèhè giɗfèk te géɗèʼa, a bèhè herkeda, aman a gi kita ndohi na.

⁵ Va-ɓücko ndohi nengaʼa man ta gi zlauaʼa, man ta derzla ma a nengaʼa te skwi man ta va na.

⁶ Gidfèkihai sèi da njo ngi-zura nengaʼa; Bi Zhiklè, nengaʼa a gi kita!

⁷ Ndohi ga, va-tsenaʼa, i woy a i gèɗè. Israel, i woy a i ngatsa ka maya. I Bi Zhiklè, iyè Zhiklè ngaya!

⁸ I ga ka ndzoan a géɗ skwi man ka zlay ɓai. Skwi man ka ndarayè te vogwa a zhè a sam di ga pèc pècèk.

⁹ I woy mari kudom ngay ka ɓai; i woy a ka vay ɓok a rèwè ɓok ngay ka ɓai.

¹⁰ Skwi hèshèkèɗ tèlè a ga ga, skwi te za, gozhèm gozhèm kumba, a ga ga.

¹¹ I sun ɗiakihai tʼhwaɗ giɗfèk tèlèba; skwi te dak, i suna.

¹² Aman mi a keɗyè, i gaɗa ka azɓai; aman herkeda a skwi nte pa tèlèba a ga ga.

¹³ I ndi zluèɗ mari dè, i si pombaz mazawal ɗè?

¹⁴ Skwi man Zhiklè a woy a ka va na: nshid gèɗ, a ka gi ara man ka gaɗa na hi a Zhiklè te géɗèʼa.

¹⁵ Tsu ri a iyè a pats mwuɗitpa, a i woy a i mbel ka, a ka, ka da slébèrdyè.

¹⁶ Aman Bi Zhiklè a gaɗa na ndo ambaɓiaʼa: Ka ngredè ma nkwèr ga, ka slefi ma kita ga èhèmè;

¹⁷ ka man ka woya man i ngatsa ka maya ɓai, a ka kwola ma ga!

¹⁸ Aman ka rka ndo metsar, ka hi ngaya a verzi na, a kin humdè va a ndohi mphömè.

¹⁹ Ka pra ma ngaya a ngèɗè ma ambaɓiaʼa, nèʼèn ngaya a cèkèlma.

²⁰ Ka nzahai a ka ngre kramam ngaya, ka dérɗè kra bab ngaya.

²¹ Ka gu arsa, a i nza tètè; a ka huro, i lèmèlèmè ara ngaya. Aman antanta i ga ka ndzoan, i ngra ka tèlè.

²² Kinè man Zhiklè a pca kinè a gèɗ, va-sun skwi haha, man ɓai i mbirc kinè, a ndo a slaha a mbel kinè asaɓai.

²³ Ndo man a shid gèɗ a Bi Zhiklè, kala man a va na skwai, a slébèrdyè zuraʼa; a ndo man a ɓer civèɗ na, i da ngra na skwi mʼmbel ndo ga.