Psaumes 49 - Ma Zhiklè

¹ Man a ndohi Koré. Psaume.

² Kin ndohi herkeda tèlèba va-tsenaʼa! Kin ndohi a géɗ herkeda tèlèba, va-fu zlembaɗ!

³ Ndohi mbelawa ba, a ndohi mbibihiaʼa ba, a ndo mèshèlè ba, a ndo ntawassa ba, tèlèba!

⁴ Ma ga da goɗ ma maya, ndav ga da hur skwi man verzi a zhè.

⁵ I woy a i fi zlembaɗ a ngèlègèɗ maʼa, a skwi man i ngotskoɗauda te ndav ga, i sli a deɓ ganzavar.

⁶ I gi zlau pats ambaɓiaʼa èhèmè, man mali ndohi mayamhi ga ta tèudyè a pa?

⁷ Tengaʼa ta pi ndav ta a suli tengaʼa, ta jégèr va a géɗ skwi mèshèlè tengaʼa.

⁸ Aman ta slaha ta shum nshèffè ta a deɓa ɓai, ko staɗ. Ndo a slaha a mpela gèɗ na a sam Zhiklè a ri na bai.

⁹ Gani nshèffè tengaʼa a vata, ta slaha ta sumkoda deɓa ɓai a mèdèp.

¹⁰ A ta slaha ta nzi a nshèffè a ma ma azɓai, ta mbelè auda te vèvèɗ azɓai.

¹¹ Halau, nga rkaʼa: Ndohi maya ta bèzl ta, ndo nrzla a madadau ta zi ta cèw ba, ta slaha ta hil skwi a ri azɓai, ndohi ngiɗè ta ndiaʼa te deɓa.

¹² Vèvèɗ, gi i tengaʼa a mèdèp; ko ta bèhè kokwar a nzlembaɗ ta.

¹³ Ndo, a nʼnjèl nengaʼa, a nzi azɓai, lèmèlèmè ara skwi ndzham man ta zli daiaʼa.

¹⁴ Nasa nshèffè ndohi man ta dzugor va a géɗ va ta genè; nasa ndikè-ma ndo-hai man ta gaɗa: ‘nga ɓi wa?’

¹⁵ Ta dè a sam mʼmetsai ara tambakihai, mʼmetsai a lè ta. Ta dè zuraʼa a vèvèɗ. Va tengaʼa a gédèsh na, sam nʼnzi tengaʼa a sam mʼmetsai.

¹⁶ Aman Zhiklè a da sumkay nshèffè ga a deɓa te ri mʼmetsai. A da ckay auda.

¹⁷ Ka hur géɗ ɓai; ko ndo ngiɗè a ndi a ndo mèshèlè, a skwi gi nengaʼa a grè a ma ma.

¹⁸ Te mʼmetsai a hil skwi na a ri azɓai, ko kèshkata, skwi mèshèlè nengaʼa a dè vèvèɗ a vna azɓai.

¹⁹ Da wol va, man a zhè a nshèffè di ba, da dzugor va a skwi nengaʼa man a zhè di ba!

²⁰ A zena a dè a va bababhi nengaʼa genè, man ta rka pats asaɓai.

²¹ Ndo man ta slébèrdèʼa, man maya na azɓai, a gi lèmèlèmè ara skwi ndzham man ta zli daiaʼa.