Psaumes 46 - Ma Zhiklè

¹ Dimèsh ndohi Koré.

² Zhiklè, sam nga nlèaʼa, wuɗi nga, skwi ntakaha nga mbiaʼa te matakwan man a ga nga.

³ Ani haha nga gi zlau azɓai, ko herkeda a nʼngwod na, ko za a mʼmbeɗ na hai a woyam mbiaʼa,

⁴ ko iyam a hubètè tskuɗuf-tkuɗufaʼa, a mbeɗda za a hai. Bi Zhiklè bi mbiaʼa a zhè a nda nga, Zhiklè Jacob, gi nga ndakmaʼa.

⁵ Kokwar Bi-Zhiklè a wuffè a géɗ woyam man a kezli gèɗ te pa, sam nʼnzi Zhiklè mbi-mbiaʼa nkezli-nkezlaʼa.

⁶ Zhiklè a zhè te ndevaʼa, gar haha kokwar a nza taraʼa. Zhiklè a takaha ta a di prèkaʼa.

⁷ Ndohi herkeda ta rubai, kokwar-bihai tsaɗ tsaɗ ta gedas ta. Aman Zhiklè a gèɗè, herkeda a gudzai.

⁸ Bi Zhiklè bi mbiaʼa a zhè a nda nga, Zhiklè Jacob, gi nga ndakmaʼa.

⁹ Vo-do, a kin rka skwi man Zhiklè a gau a géɗ herkeda, skwi mbiaʼa:

¹⁰ a til ma var tʼherkeda tèlèba, a pasla lèkèɗ, a pasla tsakwal, a peda gambar a vogwa.

¹¹ Va-nza tètè, va-senyè, i Zhiklè, mbiaʼa a sam ndohi herkeda, mbiaʼa tʼherkeda tèlèba.

¹² Bi Zhiklè bi mbiaʼa a zhè a nda nga, Zhiklè Jacob, gi nga ndakmaʼa.