Psaumes 45 - Ma Zhiklè

¹ Dimèsh ndohi Koré. Dimèsh mwoy ngwoz.

² Ncèkèslè a shkè auda a mwuffè te ndav ga. I woy a i sli dimèsh ga a bai. Nèʼèn ga nwosla kwotskwotsaʼa ara skwi man ndo mwindè ɗèlèwèr a windè a vna.

³ Mbambi ngaya a fena mbambi ndohi tèlèba, ma nhènèkèa a zhè te ma ngaya. Gar haha Zhiklè a pshè ka ma a mèdèp.

⁴ Helda tsakwal ngaya a rai, ka ngul ndo! A nʼnjèl ngaya, a njèzlè-bi ngaya a ngre-dè auda!

⁵ Gu var a wuɗai, a géɗ ma nzuraʼa, a géɗ kita nzuraʼa! Ri ngaya da gu nrkedi mbiaʼa!

⁶ Sulom ngaya ntasla! Ndohi herkeda ta bazl ta te riaʼa, a ndav ndohi mayamhi bai a mʼmbeɗ na.

⁷ Sam nʼnzi bi ngaya a nzi a ma ma a mèdèp; gada bi ngaya, gada bi ngi-zuraʼa.

⁸ Ngi-zuraʼa ambaha ka; ngi malai amba-ha ka ɓai. Gar haha Zhiklè a mbaɗa ka mbar a gèɗ a mwuffè, mbar mbelaʼa, a sam di golahi ngaya.

⁹ Ɓurdi myrrhe, aloes a cassa a ngucè te va maslaka ngaya. Hwad gi bai nʼngaʼa a kwa mbelaʼa, ganzavar a tsenkaɗauda a wuffede ka.

¹⁰ Dalahi bihai, man ka woy ta holholaʼa; medemi te civèɗ ri mandi ngaya, a guro te rai.

¹¹ Dem ga, tsena, wora, fu zlembaɗ! Gwoli ngaya, gi bab ngaya, da pca ka a gèɗ!

¹² Aman bi ngaya a woy ka a géɗ mbambi ngaya. Nengaʼa bi ngaya; ka ba, slubordo.

¹³ A ndohi Tyr ta da shkè a skwi mbali te rai, ndohi mèshèlè mbibihiaʼa te kokwar ta da shkè a ta woy a ta gaɗaha bai.

¹⁴ Dem bai mbikaɓai, maslaka guro a va, skwi daʼai te daʼai, skwi ri te rai.

¹⁵ Maslaka man gadabu a pa a va, ta daʼa a sam bai. Dalahi a mandalahi nengaʼa a verzi nengaʼa, ta feda na ma;

¹⁶ a mwuffè a ngwèshè ta daʼa a gi bai.

¹⁷ Te di man a bab ngaya, ka da gshè va a wudahi ngaya; ka da pe ta a bi kokwar tèlèba.

¹⁸ I woy a i ngredè nzlembaɗ ngaya a sam verzi ndohi herkeda tèlèba, a ndohi ta da shida ka gèɗ a mèdèp.