Psaumes 44 - Ma Zhiklè

¹ Dimèsh ndohi Korè.

² Zhiklè, nga tsena a zlembaɗ nga, bababhi nga ta njè nga. Halaʼa, man ta zhè, ri ngaya a ngu nrkedai.

³ Ka hul ndohi kokwar ngiɗè a ka pe ta a sam ngiɗè. Ka gedassa kokwar-bihai a ka venda ta gèɗ, a ta zlazlam ta.

⁴ Ta dum kokwar a tsakwal ta ka ɓai, ta ga ngula a wuɗi ta ka ɓai; aʼai, sèi a ri ngaya, ri mandi ngaya a ngau. Di ngaya a nhela ta sam, a gèɗ man ka woy ta.

⁵ Ka, bi ga, a Zhiklè ga, man a gi ndohi Jacob a ngul ndohai.

⁶ Nga a nda ka, nga dzam ta ndohi mayamhi nga; a wuɗi nzlembaɗ ngaya nga bazl ta ndohi nʼnga nga matakwan.

⁷ I hur a géɗ gaɗa lèkèɗ ga ka ɓai; tsakwal ga a slaha a ntakahayè azɓai.

⁸ Aʼai, sèi ka ka takaha nga a sam mayamhi nga; ka pa ta hori a di a ndohi shèwa nga.

⁹ Nga njèl Zhiklè pèc pècèk, ngaslébèrdè nzlembaɗ ngaya a mèdèp.

¹⁰ Ko gar haha ka kwol nga. Ka pa nga hori a dai. Aman nga ɓicè va a sam var, ka dè a verzi nga azɓai.

¹¹ Ka gu aman ndohi mayamhi nga ta dzam nga, a ndohi shèwa nga ta dum nga a ta helama nga skwai.

¹² Ka pe nga a ri a tengaʼa, ka pe nga a tambakihai man ta zlama nga daʼai; ka venda nga gèɗ a va ndohi nte deɓa.

¹³ Ka preda ndohi ngaya a ma a gani ɓai, ka dzhaɗa skwa a pa kumba ɓai.

¹⁴ Ka gu a nslamagihi nga ta derɗe nga, a ndohi man a tsagi nga ta ngwossaha nga a ta liv nga.

¹⁵ Ka gu a ndohi nte deɓa ta njè njèkenè a géɗ nga, a ndohi herkeda ta giɗè gèɗ kwotakwotaʼa a géɗ nga.

¹⁶ Pèc pècèk i tsena ara man ta derɗyè, hori a keɗyè,

¹⁷ a sam daʼai ndo man a livyè, a derɗyè, a sam di mayam man a pokoy gèɗ ndav ga auda.

¹⁸ Skwi haha tèlèba a ge nga, aman ka pca nga a gèɗ ɓi genè, a nga gu ri a géɗ nderzlè-ma ngaya ɓai.

¹⁹ Ndav nga a mʼmen na a deɓa ɓai, sak nga a mbeza zlawa a civèɗ ngaya ɓai.

²⁰ Ko man ka kwol nga, a ka de nga a sam nʼnzi nvalaval a ka wushede nga a ruva.

²¹ Man agassa Zhiklè nga a pca nga a gèɗ, a nga tsi ri azhiklèhi ngiɗè tsaɗ,

²² ar Bi Zhiklè a sun ɓi dè? Nengaʼa a sun skwi man nʼngheda te ndav.

²³ Aʼai, a géɗ ngaya ta keɗ nga pèc pècèk, ta fe nga a tambakihai a ta zlama nga daʼai.

²⁴ Slambaɗa, Bi Zhiklè, ka nzhun èhè-mè? Ciɗa dai! Ka kwol nga a mèdèp ɓai!

²⁵ Ka ngheda va ngaya èhèmè? Nlèyè nga a matakwan nga a pca ka a gèɗ èhèmè?

²⁶ Ndav nga a kuɗi beshèmaʼa te va mèrwèc, i tambala tʼherkeda.

²⁷ Slambada, a ka shkè a ka takaha nga, a ka sumka nga a deɓa a géɗ pombi ngaya!