Psaumes 42 - Ma Zhiklè

Ɗèlèwèr macecèwaʼa

¹ Dimèsh ndohi Koré.

² Ara mènèɗ man a shèkèt na a iyam, lèmèlèmè ndav ga a shèkèt na a gèɗ ngaya, Zhiklè!

³ Mpataka Bi Zhiklè, Zhiklè man a zhè a nshèffè, a keɗyè te ndav ara mi iyam. I dè a i zlècè a sam di Zhiklè a ngèmè?

⁴ I nèkèɗè kuɗa ga a hwaɗ ara skwi nʼndai, a pats a vaɗ, aman pèc pècèk ta gaɗayè: Kos Zhiklè ngaya tema?

⁵ Aman i hérè te gèɗ, ara man i do a gi Zhiklè a verzi nhèyè ndohi mbibihiaʼa, a mwuffè mbiaʼa, a nshid gèɗ, a va ndohi ngolala, a pay a pa a ndav.

⁶ Ndav ga, ka mbeɗè èhèmè? Ka ɗish va aranta èhèmè? Zhor skwi te ri Zhiklè, a zena i da shid gèɗèʼa dai, a gèɗ man nengaʼa ndo ntakahayè, a gèɗ man nengaʼa Zhiklè ga.

⁷ Ndav ga mʼmbeɗ na tʼhwaɗaʼa: gar haha i hér ka, a hinè te kokwar Jourdain, ha ndè a Hermon, a za Mitsear.

⁸ Iyam a hèy va a hai, a jurvahai a sam ndzurv iyam ngaya, a pizlèy gèɗ a pa.

⁹ A pats i kuɗai: Ndo nzi pèc pècèk da zlündo pombai! A vaɗ i sli dimèsh a i tsi rai a Zhiklè ga man a zhè a nshèffè.

¹⁰ I gaɗa na Zhiklè, sam ga ngedeng-gedengaʼa: I pca ka a gèɗ èhèmè? I dè a i lèyè, mayam ga a parahayè èhèmè?

¹¹ Ngwoshè ndohi man ta parahayè a dzahay te nguzgoz ga, te man ta gaɗayè pèc pècèk: Ani Zhiklè ngaya tema?

¹² Ndav ga, ka mbeɗè èhèmè? Ka ɗish va aranta èhèmè? Zhor skwi te ri Zhiklè, a zena i da shid gèɗèʼa dai, a gèɗ man nengaʼa ndo ntakahayè, a gèɗ man nengaʼa Zhiklè ga.