Psaumes 41 - Ma Zhiklè

¹ Psaume David.

² Mwuffè a sam ndo man a hér ndo ntawassaʼa man wuɗi na azɓai. A pats mwuɗitpa, Ndo nzi pèc pècèk a da mbelaʼa.

³ A da ɓerèʼa, a da ɓer nshèffè na, a ta wuffè a géɗ nengaʼa tʼherkeda tèlèba. A vava, ka feda a ri shèwa mayamhi nengaʼa ɓai!

⁴ Ndo nzi pèc pècèk a va na wuɗi a ndo man mʼmana tʼhai a matakwan; ka ngwoda matakwan nengaʼa tèlèba.

⁵ I gaɗa: Ndo nzi pèc pècèk, i da se ka te va! Mbelyè, aman i gu mali a sam ngaya.

⁶ Mandalahi ga ta tsay derngasl: A da metsi a ngèmè? Nzlembaɗ nengaʼa a da zi na a ngèmè?

⁷ A ndo man a shkè a ngelay dai, a shkè ara ndo man a cèkèlma, a pèr ma tʼhwaɗ ga, a ndè ngèɗè a sam ngèɗè.

⁸ Ta ngryè a sam tèlèba. Ndohi shèwá tèlèba ta hér skwi man ta da gedassyè a vna.

⁹ Matakwan mʼmetsai a ga na, mʼmana tʼhai, a slèmbèɗè azɓai.

¹⁰ Halau, ko mandal ga man i pi ndav a vna, man nga ndau movar a vna, a tsay lokotor a dai.

¹¹ Aman ka, Ndo nzi pèc pècèk, i da se ka te va, slambaɗdyè, a i woy a i ngwoda ta gèɗ a va, a i pela di man a ga.

¹² I da suna, a i gaɗa i ambaha ka a vava, aman ka va na civèɗ a ndo mayam ga a ngwossahay ɓai.

¹³ Halau, ka nzay a deɓa, te man mali a te ndav ga ɓai. Ka cyè, a i nzi a sam di ngaya a mèdèp.

¹⁴ Ngo-shüdokoy gèɗ a Ndo nzi pèc pècèk, Zhiklè Israel, tʼhinkaɗ na a mèdèp! Amen! Amen!