Psaumes 40 - Ma Zhiklè

¹ Man a David. Psaume.

² I zhèr skwi te ri Ndo nzi pèc pècèk, a i nza taraʼa te pa, a nengaʼa a zhiidko gèɗ a hai a ntsena ntsi ri ga.

³ A nckay auda te vèvèɗ ngédèshè, te draɓ, a mpay sak ga a pra, a mbatseday sak ga a hi zuraʼa,

⁴ a mvay dimèsh mɓuaʼa a ma ga, dimèsh nslébèrdè Zhiklè nga. Ta kumba ta da rkaʼa, ta da gi zlau a ta da pi ndav ta a Ndo nzi pèc pècèk.

⁵ Mwuffè a sam ndo man a pi ndav na a Ndo nzi pèc pècèk, a ndè a verzi ndohi nfi va azɓai, a ndè a verzi ndohi ncèkèl-ma azɓai.

⁶ Ka gu nrkedi kumba a sam nga, ka hur skwi a géɗ nga kumba, Ndo nzi pèc pècèk, Zhiklè ga. Skwi man a lèmdè va a ka, azɓai. I woy a i ngredè nrkedi auda, a i gèɗèʼa; aman i slaha ɓai, ta kumba, ta ngrè azɓai.

⁷ Mvi a nzli skwi a ka, ambaha ka ɓai; ka winay zlembaɗ ga. Nʼndèr skwai a mvi skwai a géɗ malai, ka dzhada ɓai.

⁸ A i gaɗa: Na haha, i shkè ma; ta wìndo te ɗèlèwèr a géɗ ga.

⁹ Ngi skwi man ka woyaʼa, ambahay kumba, Zhiklè ga. Ma kita ngaya a zhè te ndav ga.

¹⁰ I njè ngi-zura ngaya a sam mpi ndohi Zhiklè mɓicaʼa, i pizlè ma ga ɓai, Ndo nzi pèc pècèk, ka suna.

¹¹ I ngheda ngi-zura ngaya te ndav ga ɓai. I goɗ ara man ka takahayè zuraʼa. I ngheda pombi ngaya, nlèɓèslè ngaya, a sam mpi ndohi Zhiklè mɓicaʼa ɓai.

¹² Ka Ndo nzi pèc pècèk, man ndo a se ka te va, ka da kwolyè ɓai! Pombi ngaya, a nlèɓèslè ngaya da ɓeryè pèc pècèk.

¹³ Skwi ndzai a ndev ɓai a sam ga. Mali a ngatsyè, i slaha a i cede gèɗ a zhiklè ɓai. Ta ngrè azɓai, a fena gwots gèɗ ga, a wus-say va a hi arsa.

¹⁴ Ndo nzi pèc pècèk, war a ka mbelyè, vaska va, Ndo nzi pèc pècèk, a ka takahayè!

¹⁵ Tengaʼa man ta woy a ta zeday nshèffè ga, ta da ngècè hori a dai ngovkorongaʼa. Tengaʼa man ta wuffè a géɗ matakwan ga, ta da men ta a deɓa a hori a dai.

¹⁶ Tengaʼa man ta ngwossahayè kiɗè kiɗè, zlau a da dza ta, aman ta da ndara ta ndohai.

¹⁷ Ta tèlèba man ta has ka, a ta woy ngi-zuraʼa ngaya, ta da wuffè a géɗ ngaya, a ta gèɗè pèc pècèk: Ndo nzi pèc pècèk mbiaʼa!

¹⁸ Aman anai i ndo ntawassaʼa, i mbelawa. Bai, Zhiklè, heryè! Ka ndo ntakahayè, ndo mprekay auda, Zhiklè ga, ka goko ndudoh ɓai!