Psaumes 39 - Ma Zhiklè

¹ Njè ma David.

² I huro: I woy a i ɓer civèɗ ga, a nèʼèn ga da gu mali ɓai! I woy a i dzawa ma ga a teɓa, te va man ndo ambaɓiaʼa a zhè a sam ga dai.

³ Gar haha i nza ga tètè, i mbeda na a ma bai, i gaɗa bai, te man i woy a i gèɗè ma maharam ɓai. Aman a dzayè a ndav,

⁴ a ndav ga a vècè ara vog-wa. Aman i huro, a gu te ndav worwo-raʼa, a i slaha a i nzi tètè asaɓai, a i goɗa.

⁵ Ndo nzi pèc pècèk, ngray ndikè-ma nshèffè ga, a pats nshèffè ga a da nzi tèkè? A i suna, nshèffè ga a di a ndev na.

⁶ Na haha ka livay patshi ga a hwaɗ ri ngaya; nshèffè ga a sam di ngaya nara skwi ka ɓai. Halau, ko wawa man a zhè a nshèffè, nara kozlar genè.

⁷ Ndo a shèwèlè ara mèzhèɓ wof, a hèzlèwè a géɗ skwi ambalai, a ɓicè skwai, a sun ndo man a da ndia ɓai.

⁸ Anai, Ndo nzi pèc pècèk, i zhèr mè? I pi ndav a ka genè.

⁹ Mbelyè auda te ri malihi ga tèlèba. Ka gu a ndohi falihai a ta ngwossahayè ɓai!

¹⁰ I nza tètèʼa, i woy a i winè ma ga asaɓai. Aman ka, ka ngau.

¹¹ Ckoy matakwan auda te va ga! Aman ka tsyè, i zi ga.

¹² Ka ngatsa ta maya a ndohai, aman ka ga ta ndzoan a géɗ mali ta. Mbambi tengaʼa a gédèsh na ara gèɗ man goya a ndiaʼa. Ko wawa man a zhè a nshèffè, kozlar ambalai.

¹³ Ndo nzi pèc pècèk, tsena ntsi ri ga, fu zlembaɗ a kuɗ ga! A sam man i kuɗai, ka nza tètè ɓai! Aman i ara mbrok a sam ngaya, ndo nshèwèlè ara babhi ga tèlèba.

¹⁴ Jèkyè, a i wuffè zaʼa, ga man i metsi ga.