Psaumes 37 - Ma Zhiklè

¹ Man a David. Ka vassa na di a ndo man a gi skwi ambaɓiaʼa ɓai, ka gu srak a géɗ ndohi mali ɓai!

² Ta ɓüt ta tsam-tsam ara kuza, ta gwèr ta ara ksof.

³ Pu ndav a Ndo nzi pèc pècèk, gau skwi man amba, nza a kokwar ngaya, nza a nlèbèslè.

⁴ Woy mwuffè a sam Ndo nzi pèc pècèk, a nengaʼa a da va ka skwi man ndav ngaya a woya holholaʼa.

⁵ Feda nshèffè ngaya a ri Ndo nzi pèc pècèk, pu ndav a nengaʼa, nengaʼa a da rufa amba.

⁶ A gi a ngi-zura ngaya a ngré-dè auda ara skwi nhél sam dzayaʼa, a nzu-raʼa ngaya a ngrédè auda a di pats.

⁷ Nza tètè a sam Ndo nzi pèc pècèk, zhor nengaʼa! Ka gu di a ndo man manam a va ɓai, ko a géɗ ndo nʼngwèdè ndo ma ba.

⁸ Jèkeda ndzoan; ka gu ndav ɓai! Ka vassa na di a ndo ɓai, ambaɓai!

⁹ Ndohi man ta gi skwi man ambaɓai, ta zi ta, aman ndohi man ta zhèr Ndo nzi pèc pècèk ta da ndi kokwar.

¹⁰ Ndo ambaɓiaʼa a nzi kètè genè, a ze na klèng. Aman ka woy sam man na a pa, nʼazɓai.

¹¹ Aman ndohi a ndav lüɓok-waʼa ta da ndi kokwar, a ta da wuffè a géɗ gumi man a zhè a vata.

¹² Ndo ambaɓiaʼa a ngwèdè ndo nzu-raʼa, a tèɓèc ma a géɗèʼa.

¹³ Aman Bai – Zhiklè – a ngwoshè a géɗ ndo ambaɓiaʼa, a suna, pats kita nengaʼa a di a shkè.

¹⁴ Ndohi ambaɓihiaʼa ta geda tsakwal, ta mèn lèkèɗ, a ta woy a ta bazl ta ndohi man ta gi skwi zuraʼa.

¹⁵ Tsakwal tengaʼa a da ngwoda ta va a gèɗ, a nteza-ma ta ndav, a lèkèdhi tengaʼa ta pasl ta.

¹⁶ Skwi nkèshèa man ndo nzuraʼa a ngotso, a fena skwi mèshèlè ndohi ambaɓihiaʼa man a ndev ɓai.

¹⁷ Ri ndohi ambaɓihiaʼa ta pèsl ta, aman Ndo nzi pèc pècèk a nzala ta ri a ndohi nzuraʼa.

¹⁸ Ndo nzi pèc pècèk a sun pats nshèffè ndohi man ta gi zlau Zhiklè, a skwi tengaʼa a nzi a mèdèp.

¹⁹ A pats man mwuɗitpa, ta kèlèhi azɓai. A pats man mi a gai, skwi nʼndi a da ngeza ta genè.

²⁰ Ndohi ambaɓihiaʼa ta da zi ta. Ma-yamhi Ndo nzi pèc pècèk ta lèmèlèmè ara ɗaʼar mɗaʼa, a zena a ndev na, a hursh na ara lak.

²¹ Ndo ambaɓiaʼa a gi dua, a pilè te deɓaʼa azɓai. Ndo nzuraʼa a vi skwi a ndo, a va na a va na.

²² Aman ndohi man Ndo nzi pèc pècèk a pshè ta ma, ta ndi kokwar; ndohi man Zhiklè a phomde ta, ta zi ta.

²³ Ndo nzi pèc pècèk a gi a ndo a dè gidim-gidimaʼa, a wuffè a géɗ civèɗ nengaʼa.

²⁴ Ko man kwa a tsama na sak, a kèlèhi azɓai; Ndo nzi pèc pècèk a gshè ri na.

²⁵ Te va nasa i gola, antanta i babgi ma, a i rka man Ndo nzi pèc pècèk a njèkeɗa ndo nzuraʼa ɓai, a wudahi nengaʼa ta hèsh skwi nʼndi azɓai.

²⁶ Pèc pècèk ndo ngiɗè a sia te va, a vi skwi a ndo, a wudahi nengaʼa ta ngècè mpshè ma.

²⁷ Ngwoda na deɓa a skwi ambaɓiaʼa, gau skwi man amba, a ka ngècè sam nʼnzi a mèdèp.

²⁸ Aman Ndo nzi pèc pècèk a woy skwi nzuraʼa, a jèke ta ndohi man ta gi zlau nengaʼa azɓai. Tsokoɗof ndohai, a gedas ta a mèdèp. A zede ta ndohi ambaɓihiaʼa a mèdèp.

²⁹ Ndohi nzuraʼa ta da ndi kokwar, a ta nzi te pa a ma ma a mèdèp.

³⁰ Maya a zhè te ma ndo nzuraʼa, nèʼèn nengaʼa a gèɗè ma nzuraʼa.

³¹ Ma kita Zhiklè nengaʼa a zhè te ndav na, sak nengaʼa a fèɗè azɓai.

³² Ndo ambaɓiaʼa a pi va a ndo nzuraʼa, a woya a kéɗèʼa.

³³ Aman Ndo nzi pèc pècèk a jèkeda a wuɗi ri nengaʼa azɓai. Ta slaha ta phomda a sam kita azɓai.

³⁴ Zhor Ndo nzi pèc pècèk, gso civèɗ nengaʼa, a nengaʼa a da nzal ka, a ka kwèr herkeda. Ka da rka ara man ndohi ambaɓihiaʼa ta gédèsh ta.

³⁵ I rka ndo ambaɓiaʼa a gi shèwa, a grè gèɗ geɓgeɓgeɓaʼa ara wof Liban.

³⁶ Te deɓa i kètè i beza a pa zaʼa, i rka asaɓai. I woyaʼa, i ngatsa ɓai.

³⁷ War ndo man a gaʼa a njèlalaʼa, war ndo man a gi zuraʼa: nengaʼa a nzi a gumai, a ndohi te verzi nengaʼa ta zhè.

³⁸ Ndohi malihai ta da gedas ta tèlèba, ndohi ambaɓihiaʼa ta nzi azɓai.

³⁹ Skwi ntakaha ta ndohi nzuraʼa a shkè te ri Ndo nzi pèc pècèk. Nengaʼa sam tengaʼa nlèaʼa a pals matakwan.

⁴⁰ Ndo nzi pèc pècèk a takaha ta, a mbel ta, a preka ta auda te ri ndohi ambaɓihiaʼa, a géɗ man ta pi ndav a nengaʼa.