Biblia Todo Logo
Bìoball air-loidhne

- Sanasan -

Psaumes 35 - Ma Zhiklè

1 Man a David. Ndo nzi pèc pècèk, nzay a dai a sam tengaʼa man ta bèzl va a iyè, gu var a tengaʼa man ta gi var a iyè!

2 Co gambar a gaɗa, co gambar var, a ka shkè a ka da takahayè!

3 Geda ta tsakwal a zhèngèzhè a ngwai a ndohi man ta parahayè. Gaɗa na ndav ga: I takaha ka!

4 Tengaʼa man ta woy a ta zeday nshèffè, sèi da dzakaɓ ta, a ta ngècè hori a dai. Tengaʼa man ta hér ngédèsh ga, sèi ta hi a deɓa a hori a dai.

5 Sèi ta gi ara topok dau man kozlar a hilèʼa, a gol Ndo nzi pèc pècèk da dzam ta.

6 Civèɗ tengaʼa da zhè te ruva, da fada ta sak, a gol Ndo nzi pèc pècèk da kalde ta a hai!

7 Ta tilay gadda a hi ambalai, ta ngay ɓalai a hai ambalai.

8 Skwi ngedas ta da ga ta a gèɗ a nasa-nasa, a géɗ staɗ staɗ tèlèba; gadda man ta tilay a hai, do gso tengaʼa; ɓalai man ta ngay a hai, da mbeda ta a gèɗ.

9 Aman ndav ga a da gi langlangaʼa a géɗ Ndo nzi pèc pècèk, a da wuffè a géɗ man nengaʼa a ntakahayè.

10 Nfèfèn va ga tèlèba ta da gèɗèʼa: Ndo nzi pèc pècèk, ntar ka wa? Man a mbél mbelawa te ri ndo mbiaʼa man a fena nengaʼa, a mbél ndo ntawassaʼa te ri ndo metsar?

11 Ndohi malwudihi ncèkèlma ta slèmbèɗè, mali man i sun ɓai ta fay a gèɗ,

12 ta gay skwi ambaɓiaʼa, man i ga ta skwi mbelaʼa. A ta jèkyè a pa.

13 A pats man ta mbelakaɓai, i feda maslaka sam kuɗa a va, a i jèkeda skwi nʼndai a i ga na matakwan a va ga a vna. I tsu ri a gèɗ tʼhai,

14 ara man a géɗ mandal ga, kramam ga. I nza ara ndo man a kuɗi mam na, i lèyèʼa, i ɗish va.

15 Aman anai i kalahai, ta wuffè a ta humda va ta. Ndohi man i sen ta ɓai ta derɗyè, a ta ɓickay va a gèɗ, ta livyè, ta jèkè azɓai.

16 Ara nderkèzhèhai ta ngwossahayè, ta pedi zlèʼèn a géɗ ga.

17 Bai, Zhiklè, ka woy a ka pi dai a ka zhèrèʼa, ta ahngwa? Mbelay nshèffè ga te ri ndohi man ta hèzlèwè, mbelay nshèffè ga te ri wud marizhèlèhai.

18 I woy a i shi-da ka gèɗ te ndev mpi ndohi Zhiklè. I woy a i slebarde ka a sam ndohi nhayaʼa.

19 Ndohi man tagi mayam ga ambalai, da ngwossa a géɗ ga ɓai; ndohi man ta gi shèwa a iyè ambalai, da pcoko di a va ta ɓai!

20 Ta gèɗè ma gumi azɓai, ta hér ncèkèlma a géɗ ndohi man ta nza ɓeslèʼa tʼherkeda.

21 Ta winkoy ma a va fuwan-gaʼa, ta ngwèshè kiɗè kiɗè: Nga rka skwi man ka giaʼa!

22 Ndo nzi pèc pècèk, ka rka a di nga-ya, ka nze tètè bai! Bai, Zhiklè, ka nza dra a sam ga ɓai!

23 Slambaɗa, ciɗa dai, ga ta kita, nzay a deɓa, Zhiklè ga, Bi ga.

24 Gay kita ga ara ngi-zura ngaya. Ndo nzi pèc pècèk, Zhiklè ga, a ta ngwoshè a géɗ ga azɓai.

25 Da goɗ te ndav ta bai: Skwi nta man nga woyaʼa! Da goɗ bai: Nga ndedama!

26 Ta tèlèba man ta wuffê a géɗ mata-kwan ga, sèi ta ngècè hori a dai govko-rongaʼa. Tengaʼa man ta fi va a sam ga, sèi da ngots hori a dai, da derɗ ta.

27 Tengaʼa man ta wuffè a géɗ man mali ga azɓai, sèi ta sli dimèsh, ta wuffè a ta gaɗa pèc pècèk: Nga slébèrdè Ndo nzi pèc pècèk man a woy ɓèl nengaʼa a nzi a gumai.

28 A nèʼèn ga a da ngredè ngi-zura ngaya, a nʼnjèl ngaya, i vèkè a vna.

Alliance Biblique du Cameroun 1989

Bible Society of Cameroon
Lean sinn:



Sanasan