Psaumes 34 - Ma Zhiklè

¹ Man a David, a pats man a zhè a sam Abimélec; a David a gi ara ndo man madzagi a ga na, a Abimélec a ndza-maʼa.

² I woy a i slébèrdè Ndo nzi pèc pècèk lèk lèk. Nshid gèɗ a nengaʼa da nza a ma ga pèc pècèk!

³ Ndav ga da wuffa a géɗ Ndo nzi pèc pècèk! Ndohi manta manda ta gèɗ a hai ta da cinèʼa, a ta wuffè.

⁴ Ngo-slubordokoy Ndo nzi pèc pècèk, ngo-nzolokoy nzlembaɗ na, tèlèba a ma staɗ!

⁵ I hoss Ndo nzi pèc pècèk, a nengaʼa a mbeɗkay a ma, a mprekay auda te ri zlau tèlèba.

⁶ Va-pu di a nengaʼa, a hela kinè te di dzayaʼa, a kin ngècè hori a di azɓai.

⁷ Man mbelawa ngiɗè a boho, a Ndo nzi pèc pècèk a ntsenaʼa, a ntakaha te matakwan nengaʼa tèlèba.

⁸ Gol Ndo nzi pèc pècèk a nzi a tsagi tengaʼa man ta gi zlau Zhiklè, a mbel ta.

⁹ Va-ɗöl, va-war ara man ndav Ndo nzi pèc pècèk amba. Mwuffè a sam ndo man a pi ndav na a vna!

¹⁰ Va-gu zlau Ndo nzi pèc pècèk, kin ndohi nengaʼa nkezlaʼa! Aman tengaʼa man ta gi zlauaʼa, ta tèkwèn skwa azɓai.

¹¹ Wud marizhèlèhai, pats ngiɗè ta ngècè skwi azɓai, mi a keɗ ta. Aman ndo man a hèsh Ndo nzi pèc pècèk, skwi nengaʼa a zhè, a hcè azɓai.

¹² Vo-washkè, wudahi ga, va-tsena ma ga! I woy a i slebda kinè zlau Ndo nzi pèc pècèk!

¹³ Ndo man a woy nshèffè a ma-nam, ndo man a woy a nwèl va, wa?

¹⁴ Da ɓer nèʼèn na te skwi ambaɓiaʼa, a tapiɗaf ma nengaʼa a sam ncèkèlma,

¹⁵ do do na auda a sam skwi ambaɓiaʼa, da gau skwi man amba, da woy gumai, da hu a verzi nengaʼa.

¹⁶ Ndo nzi pèc pècèk a pi di a ndohi nzuraʼa, a fi zlembaɗ aman ta kuɗai.

¹⁷ Ndo nzi pèc pècèk a woy ndohi man ta gi skwi ambaɓia ɓai, a gi aman ta hér nzlembaɗ ta tʼherkeda azɓai.

¹⁸ Aman ta bèhè, Ndo nzi pèc pècèk a tsenaʼa, a mbel ta te ri skwi tengaʼa mwuɗitpa tèlèba.

¹⁹ Ndo nzi pèc pècèk a zhè ndul ndul a sam ndohi man ndav ta a mbeɗè, a taka-ha ta tengaʼa man ta kuɗi te ndav.

²⁰ Skwi man a dza na ndo nzuraʼa a zhè kumba; aman Ndo nzi pèc pècèk a mbelè auda te skwi tèlèba.

²¹ A ɓer vatasl va nengaʼa tèlèba, aman ko staɗ a pèslè azɓai.

²² Skwi man ambaɓai a da kédè ndo ambaɓiaʼa; a tengaʼa man tagi shèwa a ndo nzuraʼa, ta ngècè kita.

²³ Ndo nzi pèc pècèk a sumka ta ɓèlèlihi nengaʼa a deɓa; ta tèlèba man ta pi ndav a nengaʼa, ta ngècè kita azɓai.