Psaumes 33 - Ma Zhiklè

¹ Kin ndohi nzuraʼa, va-wuffa a géɗ Ndo nzi pèc pècèk! A ndohi man ta gi zlau Zhiklè, dimèsh nshid gèɗ ambaha ta.

² Va-sheda na gèɗ a Ndo nzi pèc pècèk a ganzavar, vo-slubordo a deɓ ganzavar man mar a pa kula!

³ Va-sla na dimèsh mɓuaʼa, vo-kol ganga nkèlè!

⁴ Aman ma Ndo nzi pèc pècèk ma nzuraʼa a vava, skwi man a gia tèlèba, nlèɓèslèʼa.

⁵ Ngi-zuraʼa a kita nzuraʼa ambaha. Herkeda nʼndha a pombi Ndo nzi pèc pècèk.

⁶ Ma Ndo nzi pèc pècèk a ngau giɗfè-kihai, nshèffè te ma nengaʼa a ngau skwi tèlè te pa.

⁷ A haya iyam te woyam mbiaʼa ara man a hayda a shiɗèf, a pizlè na ma iyam mbiaʼa a thal.

⁸ Herkeda tèlèba da gu zlau Ndo nzi pèc pècèk! Ndohi a géɗ herkeda da gu-dzau a sam na!

⁹ Skwi man nengaʼa a ngoɗa, a gi arsa. Skwi man a baha na, a shkè ma.

¹⁰ Ndo nzi pèc pècèk a gedassa skwi man ndohi herkeda ta hérèʼa; a skwi man kokwar-bihai ta woy a ta giaʼa, a ndeda a skwi ambalai.

¹¹ Skwi man Ndo nzi pèc pècèk a ntildahai, a nzi a mèdèp. Skwi man a huro, a nzi dai te verzi ndohai a ma ma.

¹² Mwuffè a sam ndohi kokwar, man Ndo nzi pèc pècèk Zhiklè tengaʼa. Mwuffè a sam ndohi herkeda, man Ndo nzi pèc pècèk a nge ta a ndohi na.

¹³ Ndo nzi pèc pècèk a paka di a hai te zhiklè, a rka ta ndohi a géɗ herkeda tèlèba.

¹⁴ A sam nʼnzi man a nza a pa, a paka di a hai; a géɗ ndohi tèlèba man ta zhè tʼherkeda.

¹⁵ Nengaʼa man a mva ta ndav a ndohi tèlèba, a wèr skwi man ta gia tèlèba.

¹⁶ Bai — ndohi var kumba a ntakaha ka ɓai. Ngul-ndo — wuɗi va nengaʼa mbiaʼa a ntakaha ka ɓai.

¹⁷ Aman ka fi gèɗ a wuɗi plèsh, ko wuɗi nengaʼa mbiaʼa, a slaha a mbél ndo azɓai.

¹⁸ Aman Ndo nzi pèc pècèk a pi di a ndohi man ta gi zlau nengaʼa, a tengaʼa man ta zhèr pombi nengaʼa.

¹⁹ A woy a ngézlè nshèffè ta auda te mʼmetsai, a ɓer nshèffè ta a pats mai.

²⁰ Ndo nzi pèc pècèk ndav nga a fi gèɗ a vna; nengaʼa skwi ntakaha nga, gambar nga.

²¹ Halau, ndav nga a wuffè a géɗ nengaʼa, nga pi ndav nga a nzlembaɗ-nengaʼa nkezlaʼa.

²² Ndo nzi pèc pècèk, pombi ngaya da zhè a géɗ nga, ara man nga zhèrè te ri ngaya.