Psaumes 29 - Ma Zhiklè

¹ Psaume David. Kin golahi Zhiklè, vo-slubordo Ndo nzi pèc pècèk! Va-nzala Ndo nzi pèc pècèk, a nʼnjèlè a wuɗai!

² Vo-slubordo Ndo nzi pèc pècèk a nʼnjèl nzlembaɗ nengaʼa! Va-kalahai a deɓ sak Ndo nzi pèc pècèk, a sam nengaʼa nkezlaʼa.

³ Daʼai Ndo nzi pèc pècèk a tsenka te va iyam. Zhiklè nʼnzalaʼa a tsi iyam. Ndo nzi pèc pècèk a zhè a géɗ iyam mbiaʼa.

⁴ Ndo nzi pèc pècèk a gèɗè a wuɗai, daʼai Ndo nzi pèc pècèk a slhè a vata.

⁵ Ngèɗè Ndo nzi pèc pècèk a pasla wof tsna, Ndo nzi pèc pècèk a pasla wof tsna te Liban.

⁶ A gi aman za Liban a tsi mɓar-wasl ara kra zlè, a Sirion ara wud kevar-hai.

⁷ Ngèɗè Ndo nzi pèc pècèk, nara mwurcè vogwa.

⁸ Ngèɗè Ndo nzi pèc pècèk a gudzede hèshèkèɗ. Ndo nzi pèc-pècèk a gudzede hèshèkèɗ Kadès.

⁹ Daʼai Ndo nzi pèc pècèk a wushede vah wof, a pasla ri wof. Te gi bi nengaʼa tèlèba ta bèhè: Nʼnjèl Zhiklè!

¹⁰ Ndo nzi pèc pècèk a nzi a géɗ iyam. Ndo nzi pèc pècèk a nzi ara bai a mèdèp.

¹¹ Ndo nzi pèc pècèk da va na wuɗai a ndohi na; Ndo nzi pèc pècèk da pshè ta ma ndohi na a gumai.