Psaumes 28 - Ma Zhiklè

¹ Man a David. Ndo nzi pèc pècèk, sam ga ngedeng-gedengaʼa, i tsi ri a ka, mbeɗkay a ma! Aman kada mbeɗay a ma azɓai, i lèmèlèmè ara ndohi dzavai.

² Tsena kuɗ ga man i kuɗi a sam ngaya, aman i zlatsede ri ga a sam ngaya nkezli-nkezlaʼa.

³ Ka zedyè a va ndohi ambaɓihiaʼa, a va ndohi mali ɓai, man ta gèɗè ma nhènèkèa a nslamagi ta, aman ta hér skwi ambaɓiaʼa te ndav ta.

⁴ Ga ta lèmèlèmè ara skwi man ta gau, ara skwi tengaʼa ambaɓiaʼa! Va ta ara mizlinè ri tengaʼa, va ta skwi ntul ta arsa!

⁵ Aman ta fi gèɗ a mizlinè Ndo nzi pèc pècèk a skwi man ri nengaʼa a ngau azɓai. A nengaʼa a da gedas ta, a da til ta te deɓaʼa asaɓai.

⁶ Ngo-shüdokoy gèɗ a Ndo nzi pèc pècèk, aman nengaʼa a ntsena ntsi ri ga mbuh-mbuhaʼa.

⁷ Ndo nzi pèc pècèk, wuɗi ga, gambar ga, i pu ndav ga a nengaʼa; te deɓaʼa a ntakahayè, a ndav ga a ngu langlangaʼa. I woy a i shida na gèɗ a dimèsh ga.

⁸ Ndo nzi pèc pècèk, wuɗi ndohi na, sam mʼmbel ndo nengaʼa man a mbaɗa na mbar a gèɗ.

⁹ Mbel ta ndohi ngaya, pshè ta ma ndohi nʼndi gi ngaya, war ta, takaha ta pèc pècèk!