Psaumes 27 - Ma Zhiklè

¹ Man a David. Ndo nzi pèc pècèk, skwi nhél sam askwi mbelyè. I gi zlau ngè? Ndo nzi pèc pècèk, wuɗi nshèffè ga. I gudzi te ri ngè?

² Aman ndohi shèwa ta kalay a va, ta woy a ta cizlyè a hai, ndohi mparahayè a mayamhi ga arsa, sèi ta fèɗ ta hai a ta kèlèhai.

³ Ko ndohi var ta tèudyè a pa, ndav ga a mbeɗè azɓai. Ko a sam var nduzoʼa, i nza tara genè.

⁴ I dzhoɗo skwi staɗ a sam Ndo nzi pèc pècèk, man i hèshèʼa: I woy a i nzi a gi Ndo nzi pèc pècèk a pats nshèffè ga tèlèba, a i rka mbi man a Ndo nzi pèc pècèk, a i war gi nengaʼa a mwuffè.

⁵ Aman nengaʼa a ɓeryè te gi na a pats mwuɗitpa, a nghedyè a sam nengaʼa, a nzlatsedyè a géɗ pra.

⁶ Anai gèɗ ga zangalaʼa a géɗ mayamhi ga tèlèba man ta tèudyè a pa. Gar haha i woy a i va na skwi te gi Zhiklè a sam ntsi tolom, i woy a i sli dimèsh a i tsi ganzavar a Ndo nzi pèc pècèk.

⁷ Ndo nzi pèc pècèk, tsena mbèhè ga, i bèhè a wuɗai, i da se ka te va, co ma ga!

⁸ Ndav ga a gaɗayè a géɗ ngaya: Hos di nengaʼa! Ndo nzi pèc pècèk, i woy a i hèsh di ngaya.

⁹ Ka ngheda di ngaya a sam ga ɓai! Ka zlreda ɓèl ngaya a deɓa a ndzoan ɓai! Ka takahayè te va nasa. Ka jèkyè ɓai, i da pca ka a gèɗ ɓai, Zhiklè, ndo mʼmbelyè!

¹⁰ Ko nda bab ga a mam ga ta kwolyè, aman Ndo nzi pèc pècèk a cyè.

¹¹ Ndo nzi pèc pècèk, sendayè civèɗ ngaya, dyè a civèɗ nlèmdaʼa, a géɗ mayamhi ga.

¹² Ndo nzi pèc pècèk, ka vyè a ri a shèwa mayamhi ga ɓai! Ndohi malwuɗihi ncèkèlma kumba ta slambaɗkay a va, ta vadahay htsan.

¹³ Pombi Ndo nzi pèc pècèk a pay a pa a ndav tʼherkeda man ndohi ta zhè a nshèffè.

¹⁴ Pu ndav a Ndo nzi pèc pècèk! Nza taraʼa, ka gu zlau ɓai! Pu ndav a Ndo nzi pèc pècèk!