Psaumes 26 - Ma Zhiklè

¹ Man a David. Ndo nzi pèc pècèk, bazlay kita ga, te man i gi mali azɓai, i pi ndav a Ndo nzi pèc pècèk, i jèkè azɓai.

² Ndo nzi pèc pècèk, waryè, jkedyè, wuzhè ndav ga kala hwaɗaʼa.

³ Te man pombi ngaya a zhè a sam di ga, a i jèjèr ma nzura ngaya.

⁴ I nza a nda ndohi ncèkèlma ɓi pal ba, i da a gi ndo nʼngwèdè ndo ɓai.

⁵ Sam mɓica va ndohi malai i woya ɓai, i nzahi a sam ncèmma ndohi ambaɓihiaʼa ɓi pal ba.

⁶ Ri ga mpana, mali nlizha ɓai, a i dè a sam mvi skwi a ka, Ndo nzi pèc pècèk,

⁷ a i fi dimèsh nslébèrdè ka a daʼai mbiaʼa, a i njè nrkedi ngaya tèlèba.

⁸ Ndo nzi pèc pècèk, gi man ka nzi a pa, ambahayè, sam man nʼnjèl ngaya a zhè a pa.

⁹ Ka zeday ndav ga a va ndohi malihai, a nshèffè ga a va ndohi nkeɗe ndo, ɓai,

¹⁰ man mali a ri tengaʼa, a skwi man ta ruɓ ta a vna, nʼndha nte ri ta.

¹¹ Aman iyè, i nzi amba, i gi mali azɓai. Ndo nzi pèc pècèk, pryè auda, vay pombai!

¹² Sak ga a nza taraʼa a sam ndizlèa; i woy a i slébèrdè Ndo nzi pèc pècèk te ndev mpi ndohi Zhiklè.