Psaumes 20 - Ma Zhiklè

¹ Psaume David.

² Ndo nzi pèc pècèk da co ntsi ri ngaya a pats mwuɗitpa, nzlembaɗ Zhiklè Jacob da ɓer ka!

³ Da zlinda ka skwi ntakaha ka te sam nkezlaʼa, te za Sion da nzal ka!

⁴ Da hur skwi man ka va na tèlèba, skwi man ka ndara na, da ambaha.

⁵ Da va ka skwi man ndav ngaya a woyaʼa, da takaha ka aman ka rufa skwi man ka herdahai.

⁶ Nga woy a nga wuffè a gèɗ skwi mʼmbel ngaya, nga zlècèdè skwi malwuɗi a nzlembaɗ Zhiklè nga. Ndo nzi pèc pècèk da co ntsi ri ngaya tèlèba!

⁷ Antanta i suna, Ndo nzi pèc pècèk a mbel ndo man a mbaɗa na mbar a gèɗ, a mbedka na a pa a sam nengaʼa nkezlaʼa te zhiklè, a takaha a skwi man a gau a wuɗi ri mandi nengaʼa.

⁸ Matakahia ngiɗè ta hèsh wuɗi tekiki var, te plèsh; aman nga, nga hèshè te nzlembaɗ Ndo nzi pèc pècèk, Zhiklè nga.

⁹ Tengaʼa ta hurv ta a ta kèlèhai. Nga, nga slambaɗa a nga zlatsa.

¹⁰ Ndo nzi pèc pècèk, ga bai a ngulaʼa! A pats man nga tsi rai, mbeɗa nga a ma!