Psaumes 19 - Ma Zhiklè

¹ Psaume David.

² Giɗfèkihai ta ngredè nʼnjèl Zhiklè, ta njè skwi man ri nengaʼa a gau.

³ Nvèk mpatsna a ngra na nvèk mango-slèmaʼa, vaɗ mpatsna a ngra na vaɗ mangoslèmaʼa,

⁴ a ma ka ɓai, a nèʼèn ka ɓai, a daʼai man ndo a tsena ɓai.

⁵ Aman malwuɗi tengaʼa a shine tʼherkeda tèlèba, nzlembaɗ tengaʼa a cine kala a verzi herkeɗa. Te pa Zhiklè a mva na sam nʼnzi a pats.

⁶ Pats a shkè auda te gi na ara ntsima, a jèjèr civèɗ na ara ngul ndo,

⁷ a hünkoɗi te verzi gi ngiɗè, a dè a nkala man a géɗèʼa, skwi a nghédè a sam di na azɓai.

⁸ Ma kita Ndo nzi pèc pècèk jèlèlèʼa, a ngwèdè ndav ndo. Malwuɗi Ndo nzi pèc pècèk, malwuɗi nzuraʼa, a va ta maya a ndohi man maya ta a hcè.

⁹ Ma-bi Ndo nzi pèc pècèk amba, a vi mwuffè a ndav; ma nkwèr Ndo nzi pèc pècèk tsarayaʼa, a win dai.

¹⁰ Zlau Ndo nzi pèc pècèk a nzi a mèdèp, a til nga, a nga nzi ndzuwaɗaɗaʼa. Ma Zhiklè a goɗ a vava, zuraʼa tèlèba.

¹¹ Ta fena guro, guro ndaɓalaʼa kumba, hontuktukaʼa a fena vongwom, a fena dazliaʼa.

¹² Ɓèl ngaya ba a nʼngots maya te pa. Ndo man a jèjèrèʼa, skwi ntul nengaʼa a zhè a vata.

¹³ Gar i gu mali ngama ngama, nsun wa? Man mali nʼnghedaʼa a zhè, prayè!

¹⁴ Ɓür ɓèl ngaya a sam ndohi nfi va, a ta gi bi a gèɗ ga azɓai. Te deɓaʼa i nza, mali ga azɓai, ndav ga mpana te mali mbiaʼa.

¹⁵ Ma man i goɗa a skwi man i hur te ndav, da ambaha ka, Ndo nzi pèc pècèk, sam ga ngedeng-gedengaʼa, a ndo mbelyè.