Psaumes 16 - Ma Zhiklè

¹ Dimèsh David. Mpi ndav a Zhiklè Zhiklè, ɓeryè, aman i pi ndav ga a ka.

² I gaɗa na Ndo nzi pèc pècèk: Ka bi ga. Manam ga ngiɗè azɓai, sèi te ka.

³ Ndohi nkezlaʼa te kokwar, tengaʼa man Zhiklè a wuffè a géɗ tengaʼa.

⁴ Tengaʼa man ta hi a verzi skwi mbèh skwi ngiɗè tsaɗ tsaɗ, ta si matakwan kumba. Aman iyè, i da zla ta skwai a i va ta pombaz azɓai, i bèhè nzlembaɗ tengaʼa azɓai.

⁵ Ndo nzi pèc pècèk, nengaʼa skwi nʼndi gi ga, ncèk ga. Ka tilay di man a ga.

⁶ I ngotso a sam mbelaʼa; skwi nʼndi gi ga ambahayè kumba.

⁷ I shid gèɗ a Ndo nzi pèc pècèk man a ngray maya; ko a vaɗ ndav ga a gaɗayè.

⁸ Ndo nzi pèc pècèk a zhè a sam di ga pèc pècèk. Aman a zhè a tsagi ga, i kèlèhi azɓai.

⁹ Gar haha i wuffè, a ndav ga a gi langlangaʼa. Ko va ga a nza na.

¹⁰ Aman ka jèkè nshèffè ga a ri a mʼmetsi azɓai, a ka gi aman ɓèl ngaya nlèɓèslèa a huslè azɓai.

¹¹ Ka ngray civèɗ nshèffè. Mwuffè man a ndha ndav ga a zhè a sam di ngaya; ngi langlangaʼa a zhè a tsagi ngaya a mèdèp.