Psaumes 15 - Ma Zhiklè

¹ Psaume David. Ndo nzi pèc pècèk, nslaha a nzi a gi ngaya wa? Nslaha a nzi te za ngaya nkezlaʼa wa?

² Nengaʼa man a gi mali azɓai, a gi skwi nzuraʼa, a gèɗè ma nzuraʼa a ndav tèlèba.

³ Man tiflè a te ma nengaʼa ɓai, a ga na skwi ambaɓiaʼa a ndo azɓai, a dérɗè nslamagi nengaʼa azɓai.

⁴ Man a kwola ndo man a Zhiklè a kwolaʼa, a slebarde ta ndohi man ta gi zlau Zhiklè. A gi ara man a mbaɗa, ko skwi na a zi a verziaʼa.

⁵ Man a vi suli a dua, a jhèɗè mpataka a vaʼa azɓai. A cè suli man ta ruɓè a vna azɓai, a bèzlè kita ndo man nʼnga mali ɓai, azɓai. Ndo man a gi arsa, a kèlèhi azɓi fèt.