Psaumes 148 - Ma Zhiklè

¹ Alléluia! Va-shüd gèɗ a Ndo nzi pèc pècèk, te zhiklè te géɗèʼa! Va-shüd gèɗ a nengaʼa, te géɗèʼa!

² Va-shüd gèɗ a nengaʼa, kinè golahi nengaʼa tèlèba!

³ Va-shüd gèɗ a nengaʼa, pats a kia, va-shüd gèɗ a nengaʼa, kinè bantihai tèlèba!

⁴ Va-shüd gèɗ a nengaʼa, giɗfèk te géɗèʼa, a kinè vanihi ba!

⁵ Sèi ta shida na gèɗ a Ndo nzi pèc pècèk; aman nengaʼa a goɗa, a ta gaʼa.

⁶ A mpe ta a sam nʼnzi ta a mèdèp, a tila ta sam ta, man a ngwèdè azɓai.

⁷ Va-shüd gèɗ a Ndo nzi pèc pècèk, kinè tʼherkeda, a zlè iyam te drav iyam tèlèba,

⁸ vogwa a vandzal, a minmèn a ndodok a ndombozlor, man kin gi malwuɗi ma nengaʼa.

⁹ Kinè zahai a ngègèɗhi tèlèba, wof man a yiè, a wof tsna tèlèba,

¹⁰ skwi dak a skwi kuɗom, skwi nda a hwaɗhai, a ɗiakihai,

¹¹ bihi herkeda, a ndohi a géɗ herkeda tèlèba, wud bihai a ndohi kita a géɗ herkeda tèlèba,

¹² golahai a dalahai tèlèba, a babgihai a wudahi ba!

¹³ Sèi ta shid gèɗ a nzlembaɗ Ndo nzi pèc pècèk, aman nzlembaɗ nengaʼa mbiaʼa staɗ genè. Nʼnjèl nengaʼa a fena herkeda a giɗfèk tèlèba,

¹⁴ a nengaʼa a da gi nʼnjèl ndohi nengaʼa a mbiaʼa. Ndohi Zhiklè tèlèba ta da shid gèɗ a géɗ nengaʼa, a ndohi Israel tèlèba, a ndohi man ta a tsagi ta. Alléluia!