Psaumes 146 - Ma Zhiklè

¹ Alléluia! Slubordo Ndo nzi pèc pècèk, ndav ga!

² I woy a i slébèrdè Ndo nzi pèc pècèk, ha nshèffè ga a ndev na. I woy a i sli dimèsh a Zhiklè ga, aman i nzi a nshèffè dai.

³ Kin pu ndav kinè a bihi ɓai! Kin pu ndav kinè a ndo ɓai! Ndo a slaha a mbel kinè ɓai.

⁴ Nshèffè nengaʼa klèng, a minè a deɓa a herkeda, a skwi man a hur a da giaʼa, a zi na.

⁵ Mwuffè a sam ndo man Zhiklè Jacob a takaha, ndo man a zhèr skwi te ri Ndo nzi pèc pècèk, Zhiklè nengaʼa.

⁶ Zhiklè, man a gau giɗfèk a herkeda, a iyam mbiaʼa, a skwi tèlèba te pa, a lèɓèslè a mèdèp;

⁷ man a helka ta ndohi man ta ga ta matakwan, auda te kita; a va ta movar a ndohi man mi a keɗ ta. Ndo nzi pèc pècèk a preka ta ndohi ɓèlè auda.

⁸ Ndo nzi pèc pècèk a winè ta di a mandazlihai. Ndo nzi pèc pècèk a zlatsede ta ndohi nhurvaʼa. Ndo nzi pèc pècèk a woy ndohi nzuraʼa.

⁹ Ndo nzi pèc pècèk a ɓer ta ndohi mbrokihaj, a takaha ta ko kra dikai, ko ngwoz mazai; aman ndohi ambaɓihiaʼa a zlakede ta.

¹⁰ Ndo nzi pèc pècèk a gi bai a mèdèp. Sion, Zhiklè ngaya a zhè a ma ma, ha verzi wud wuda. Alléluia!