Psaumes 145 - Ma Zhiklè

¹ Dimèsh nshidgèɗ. Man a David. I woy a i nzal ka, Zhiklè, bi ga! A i slébèrdè nzlembaɗ ngaya a ma ma a mèdèp.

² I woy a i slébèrdè ka pèc pècèk, a i shid gèɗ a nzlembaɗ ngaya a ma ma a mèdèp.

³ Ndo nzi pèc pècèk mbiaʼa, amba aman ta slébèrdèʼa, ngima nʼnjèl nengaʼa azɓai.

⁴ Verzi ndo staɗ staɗ a njè ma nzlembaɗ ngaya a sam wud wud na, a ta njè nrkedi ngaya mbiaʼa.

⁵ Ta ngrédè nslébèrdè ngaya, a nʼnjèl ngaya, a wuɗi-bi ngaya. I da gèɗè zaʼa a géɗ nrkedi ngaya.

⁶ Ta slefi korassi wuɗi ngaya, a i da njè skwi mbiaʼa man ka giaʼa.

⁷ A ta gi, a ndohi ta hér mwoy-ndo ngaya, a ta zlèzlèmè ngi-zuraʼa ngaya.

⁸ Ndo nzi pèc pècèk, ndo a sia te va, a pi a ndo, agi ndav tsam-tsam azɓai, pombi nengaʼa a ndev ɓai.

⁹ Ndo nzi pèc pècèk amba a sam ndohi tèlèba, a skwi man a gu tèlèba ta sia te va.

¹⁰ Ndo nzi pèc pècèk, skwi man ka gu tèlèba ta shida ka gèɗ, a ɓèlèlihi ngaya ta slebarde ka.

¹¹ Ta njè jnʼnjèl ngi-bi ngaya, a ta slefi nrkedi ngaya.

¹² A ta senda ta nrkedi ngaya a ndohai, nʼnjèlè a nslébèrdè ngi-bi ngaya.

¹³ Kokwar-bi ngaya, kokwar-bi man a nzi a mèdèp. Ngi-bi ngaya a dè a ma ma ha verzi wud wuda. Ndo nzi pèc pècèk nlèɓèslèa te ma nengaʼa tèlèba, a woy ndo te skwi man a gia tèlèba.

¹⁴ Ndo nzi pèc pècèk, man ndohi man ta kèlèhai ta thè va a vna. A da zlatsede ta ndohi nhurvaʼa.

¹⁵ Di ndohi tèlèba ta zhèr skwi te ri ngaya, a ka va ta skwi nʼndai tiɗè samaʼa, tiɗè samaʼa.

¹⁶ Ka winè ri ngaya, a ndohi tèlèba ta ngeza a skwi man ta tèkwènèʼa; a ngeza ta.

¹⁷ Ndo nzi pèc pècèk, zuraʼa te civèɗ nengaʼa tèlèba; te skwi man a gia tèlèba a woy ndo.

¹⁸ Ndo nzi pèc pècèk a zhè ndul a sam ndohi tèlèba man ta baha na, tèlèba man ta baha na a nzuraʼa.

¹⁹ A gi ara man ndohi man ta gi zlauaʼa ta woyaʼa. A tsena mbèhè tengaʼa, a mbel ta.

²⁰ Ndo nzi pèc pècèk a ɓer ta ndohi man ta woyaʼa a ndav ta; a ndohi ambaɓihiaʼa tèlèba a da gedas ta aussa.

²¹ Ma ga a da slébèrdè Ndo nzi pèc pècèk, a ndohi a géɗ herkeda tèlèba ta da slébèrdè nzlembaɗ nengaʼa nkezlaʼa a ndè a ma ma a mèdèp.