Psaumes 141 - Ma Zhiklè

¹ Psaume David. Ndo nzi pèc pècèk, i tsi ri a ka, vasko va a ka takahayè! Fu zlembaɗ a ma ga, aman i kuɗi a sam ngaya!

² Ntsi ri ga do do a sam ngaya ara vodzok ɓurdi! Aman i zlècèdè ri ga, da gau a ntsi ri dakwaɗ.

³ Ndo nzi pèc pècèk, ɓeray ma ga, ɓür tapiɗaf ma ga mbelembela.

⁴ Ka ngalday ndav ga a sam ngèɗè skwi ambaɓiaʼa ɓai, a i da gi skwi ambaɓiaʼa a verzi ndohi mali azɓai.

⁵ Aman ndo nzuraʼa a tsyè, di na; aman ndo nzuraʼa a nʼngezyè, di na. Aman mbar ndohi ambaɓihia i woy a gèɗ ga ɓai, te man ntsi ri ga a gi malwuɗai a gèɗ shèwa tengaʼa.

⁶ Ndohi kita tengaʼa ta tseda ta gèɗ a kwa, a ta da suna, i goɗ ma nhènèkèʼa.

⁷ A herkeda a da cizl na, a vataslhi tengaʼa ta da wushahai a pa a sam mʼmetsai.

⁸ Ndo nzi pèc pècèk, Bai, nga pi di a verzi ngaya. I pi ndav ga a ka, ka zeday nshèffè ga ɓai!

⁹ Beryè a sam ɓalai man ta ngay a hai, a sam ɓalai ndohi malihai!

¹⁰ Ndohi ambaɓihiaʼa da mbeɗ ta a ɓalai tengaʼa; aman iyè, i bizhè auda a samaʼa.