Psaumes 140 - Ma Zhiklè

¹ Psaume David.

² Ndo nzi pèc pècèk, prekay auda te ri ndo man ambaɓai, ɓeryè te ri ndohi ngi ma a wuɗai,

³ man ta her skwi ambaɓiaʼa te ndav ta. Lèk lèk ta woy a ta bèzl va.

⁴ Nèʼèn tengaʼa nzrak cèw ara zhüzhok. Ma tengaʼa dèrè zhüzhok nder-tektekaʼa.

⁵ Ndo nzi pèc pècèk, ɓèryè te ri ndohi ambaɓihiaʼa, nghedyè a sam di ndohi ngi ma a wuɗai, man ta hèsh civèɗ a ta kalde nga a hai.

⁶ Ndohi nfi va ta pay gadda a hai, a zhèwèd a civèɗ, ta woy a ta gsamay sak, ta ngay ɗali a hai a zolom civèɗ.

⁷ I gaɗa na Ndo nzi pèc pècèk: Ka Zhiklè ga, fu zlembaɗ a ntsi ri ga, Ndo nzi pèc pècèk!

⁸ Ndo nzi pèc pècèk, Bai, skwi ntakahayè mbiaʼa; ka ɓer gèɗ ga a pats var.

⁹ Ndo nzi pèc pècèk, ka va na skwi man ndo ambaɓiaʼa a woya ɓai! Ka va na civèɗ a skwi man a woya a ngia ɓai!

¹⁰ Tengaʼa man ta ngalyè a pa, da gur gèɗ ɓai! Shèwa man ta woy a ta giaʼa, da ngwoda ta va a gèɗ!

¹¹ Zhiklè da zuvka ta ndazli vogwa a gèɗ ara iyam, da wu-shede ta a hai a vèvèɗ mpèltemtemaʼa, a ta slambaɗkaɗauda te pa asaɓai.

¹² Ndo nʼngre ndo a nzi a gèɗ herkeda azɓai. Ndo ngi ma a wuɗai, matakwan da dzodzora, da kaldahi a mèdèp!

¹³ I suna, Ndo nzi pèc pècèk a nʼnza ta a deɓa a mbelaw ndohai, a helka ta ndohi ntawassaʼa auda te kita.

¹⁴ Halau, ndohi nzuraʼa ta da slébèrdè nzlembaɗ ngaya, ndohi man ta woy Zhiklè ta da nzi a sam di ngaya.