Psaumes 136 - Ma Zhiklè

¹ Va-shüd gèɗ a Ndo nzi pèc pècèk, aman nengaʼa amba; aman pombi nengaʼa a nzi a mèdèp.

² Va-shüd gèɗ a Bi Zhiklè, Zhiklè a géɗ zhiklèhai aman pombi nengaʼa a nzi a mèdèp.

³ Va-shüd gèɗ a bi a gèɗ bihi tèlèba; aman pombi nengaʼa a nzi a mèdèp.

⁴ Nengaʼa man a gi nrkedi mbiaʼa staɗ genè; aman pombi nengaʼa a nzi a mèdèp.

⁵ Nengaʼa man a gu giɗfèk a maya; aman pombi nengaʼa a nzi a mèdèp.

⁶ Nengaʼa man a ga na herkeda a géɗ a iyam; aman pombi nengaʼa a nzi a mèdèp.

⁷ Nengaʼa man a gu skwi nhél sam mbiaʼa; aman pombi nengaʼa a nzi a mèdèp.

⁸ Pats a gi bi pats; aman pombi nengaʼa a nzi a mèdèp.

⁹ Kia a gi bi vaɗ; aman pombi nengaʼa a nzi a mèdèp.

¹⁰ Nengaʼa man a bazl ta tsuvomhi te kokwar Egypte; aman pombi nengaʼa a nzi a mèdèp.

¹¹ A nhelka ta ndohi Israel auda te kokwar tengaʼa; aman pombi nengaʼa a nzi a mèdèp.

¹² A ri man wuɗi na zhè a ntorko rai; aman pombi nengaʼa a nzi mèdèp.

¹³ A nʼngela iyam mbiaʼa te va cèw; aman pombi nengaʼa a nzi a mèdèp.

¹⁴ A mbezde ta ndohi Israel a ndevaʼa; aman pombi nengaʼa a nzi a mèdèp.

¹⁵ A nzede Pharaon a ndohi var nengaʼá a hwaɗ iyam; aman pombi nengaʼa a nzi a mèdèp.

¹⁶ A de ta ndohi nengaʼa a ndev hèshèkèɗ; aman pombi nengaʼa a nzi a mèdèp.

¹⁷ Nengaʼa man a bazl ta bihi mbibihiaʼa; aman pombi nengaʼa a nzi a mèdèp.

¹⁸ A bazl ta bihi man wuɗi ta a zhè; aman pombi nengaʼa a nzi a mèdèp.

¹⁹ Sihon, bi Amor; aman pombi nengaʼa a nzi a mèdèp.

²⁰ A Og, bi Basan; aman pombi nengaʼa a nzi a mèdèp.

²¹ A mva ta kokwar tengaʼa a skwi nʼndi gai; aman pombi nengaʼa a nzi a mèdèp.

²² A skwi nʼndi gai a Israel, ɓèl na; aman pombi nengaʼa a nzi a mèdèp.

²³ Nengaʼa man a her nga te mbelaw nga; aman pombi nengaʼa a nzi a mèdèp.

²⁴ A nʼngezlka nga auda te ri ndohi nʼnga nga matakwan; aman pombi nengaʼa a nzi a mèdèp.

²⁵ Nengaʼa man a va ta skwi nʼndai, a skwi a nshèffè tèlèba; aman pombi nengaʼa a nzi a mèdèp.

²⁶ Va-shüd gèɗ a Bi Zhiklè te géɗèʼa; aman pombi nengaʼa a nzi a mèdèp!