Psaumes 135 - Ma Zhiklè

¹ Alléluia! Va-shüd gèɗ a Ndo nzi pèc pècèk, va-shüd gèɗ a Ndo nzi pèc pècèk, kinè ɓèlèlihi nengaʼa!

² Kinè man kin te gi Ndo nzi pèc pècèk, te gala gi Zhiklè nga.

³ Va-shüd gèɗ a Ndo nzi pèc pècèk, aman Ndo nzi pèc pècèk amba. Va-slu nzlembaɗ nengaʼa te dimèsh, aman nengaʼa a woy ndo.

⁴ Ndo nzi pèc pècèk a nʼngotsko Jacob auda, a nʼngotsko Israel auda a skwi na.

⁵ Iyè, i suna: Ndo nzi pèc pècèk mbiaʼa. Bi nga a fena zhikièhi ngiɗè tèlèba.

⁶ Skwi man a woya tèlèba, Ndo nzi pèc pècèk a giaʼa, te zhiklè te géɗèʼa, tʼherkeda ba, tʼhwaɗ iyam mbiaʼa, te drav ba.

⁷ A slambaɗdekoɗi vanihai te verzi gai, a gi a iyam a ndi dai, ga a shkè. A proko kozlar auda te gi na.

⁸ Nengaʼa man a bazla tsuvomhi te Egypte, a ndohi ba a skwihi ba.

⁹ A nʼngreda skwi auda, a ngu nrkedi te ndev kinè, kokwar Egypte, a gèɗ Pharaon, a gèɗ golahi nengaʼa tèlèba.

¹⁰ A mbazl ta ndohi herkeda kumba, a mbazl ta bihi mibihiaʼa:

¹¹ Sihon, bi Amor; Og, bi Basan; a bihi kokwar Canaan tèlèba.

¹² A mpa na kokwar bihi tengaʼa Israel, a ndohi na, a skwi nʼndi gi tengaʼa.

¹³ Ndo nzi pèc pècèk, nzlembaɗ ngaya a nzi a mèdèp. Ndo nzi pèc pècèk, ndohi ta her ka a ma ma, ha ndè a ma wud wuda.

¹⁴ Aman Ndo nzi pèc pècèk a da ngela ta kita a ndohi na; aman ɓèlèlihi nengaʼa ta sia te va.

¹⁵ Zhikièhi ndohi nte deɓa, kwa a rɓasl, skwi man ndo a gau a ri na.

¹⁶ Ma ta a zhè, ta gèɗè a vna azɓai. Di ta zhè, ta rka a vna ɓai.

¹⁷ Zlembad ta a zhè, ta tsena a vna ɓai. Ta shèffe azɓai.

¹⁸ Tengaʼa man ta ge ta, a tengaʼa man ta fi gèɗ a vna, ta da gi lèmèlèmè ara skwi nrama sa.

¹⁹ Ndohi gi Israel, va-shüd gèɗ a Ndo nzi pèc pècèk! Ndohi gi Aaron, va-shüd gèɗ a Ndo nzi pèc pècèk!

²⁰ Ndohi gi Lévi, va-shüd gèɗ a Ndo nzi pèc pècèk! Kin tèlèba man kin gi zlau Ndo nzi pèc pècèk, va-shüd gèɗ a Ndo nzi pèc pècèk!

²¹ Nga slébèrdè Ndo nzi pèc pècèk te Sion, nengaʼa man a nzi te Jérusalem. Alléluia!