Psaumes 132 - Ma Zhiklè

¹ Dimèsh ndè a gi Zhiklè. Ndo nzi pèc pècèk, hur David, a mizlinè nengaʼa tèlèba man a gu a wuɗi a va.

² Aman a mbaɗa a Ndo nzi pèc pècèk, aman a ngaɗa na ma a hai a Zhiklè Jacob, man wuɗi na zhè:

³ I dè a hwaɗ gi ga azɓai, i mènèhi a sam mʼmènè ga azɓai,

⁴ i fi nzhunè a di ga azɓai, i pizlè di azɓai,

⁵ ha i ngatsa na sam nʼnzi a Ndo nzi pèc pècèk, a gi a Zhiklè Jacob man wuɗi na zhè.

⁶ Na haha, nga tsenaʼa, koti Zhiklè a zhè te Ephrata; nga ngots te gi dau man wof a maʼa, te Jaar.

⁷ Ngo-dokoya a sam gi nengaʼa, nga da kèlèhi a sam skwi nfi sak nengaʼa!

⁸ Ndo nzi pèc pècèk, slambaɗa, a ka shkè a sam nshèk va ngaya, kinè a koti nderzlè-ma ngaya man wuɗi na zhè.

⁹ Ndohi mvi skwi a Zhiklè da pu ngi-zuraʼa a va ara maslaka, ndohi ngaya da wuffa!

¹⁰ A géɗ David, ɓèl ngaya, ka kwola ndo man ka fada na mbar a gèɗ ɓai!

¹¹ Ndo nzi pèc pècèk a mʼmbaɗa na a David; a mindè mʼmbèɗè nengaʼa auda azɓai. Nengaʼa staɗ genè te va ndohi ver-zi ngaya, i njidèʼa a sam nʼnzi bi ngaya.

¹² Aman wudahi ngaya ta fi gèɗ a nderzlè-ma ga, a ma mal wuɗi ga man i da senda ta, wudahi tengaʼa ba ta da nzi a géɗ sam nʼnzi bi ngaya a mèdèp.

¹³ Ndo nzi pèc pècèk a nʼngotsko Sion auda, a woyaʼa a sam gi bi nengaʼa.

¹⁴ Nasa sam nshèk va ga a mèdèp. I nzi a pa, te man i woya arsa.

¹⁵ I da pshè na ma kumba, a ndohi nengaʼa ntawassaʼa ta ngècè skwi nʼndai.

¹⁶ A ndohi mvi skwi a Zhiklè i da va ta skwi mʼmbel ndo ara maslaka a va, a ndohi nengaʼa ta hèzlèwè a mwuffè.

¹⁷ Te pa i da va na wuɗai a David, i va na skwi nhél sam a ndo man i faɗa na mbar a gèɗ.

¹⁸ Ndohi mayamhi nengaʼa i da paɗ ta a pa a horai; aman skwi mpèɗè gèɗ nengaʼa a da si dai.