Psaumes 124 - Ma Zhiklè

¹ Dimèsh ndè a gi Zhiklè. Dimèsh David. Israel da goɗa: Aman agassa Ndo nzi pèc pècèk a te va nga ɓai –

² Aman agassa Ndo nzi pèc pècèk a te va nga ɓai, a pats man ndohi ta slambaɗka nga va,

³ ar ta gerde nga a hwaɗ a di tʼuda, a pats man ta gu ndzoan a géɗ nga.

⁴ Ar iyam a mbizhèma nga gèɗ a pa, a iyam man a hi te woyam a wuɗai a cè nga ma,

⁵ a iyam man a gi tskuɗuf-tskuɗufaʼa a zede nga a pa.

⁶ Nga shid gèɗ a Ndo nzi pèc pècèk, man a va nga a hwaɗ ri tengaʼa ɓai.

⁷ Nshèffè nga, nara ɗiak man a mbel na a sam ndo man a woy a a ngshèʼa, a nceda votók a verzai, a nga mbel nga.

⁸ Skwi ntakaha nga a zhè a nzlembaɗ Ndo nzi pèc pècèk man a gu giɗfèk a herkeda.