Psaumes 119 - Ma Zhiklè

¹ Mwuffè a sam ndohi man ta nzi jèlalaʼa a civèɗ ta, man ta jèjèr ma kita Ndo nzi pèc pècèk!

² Mwuffè a sam ndohi man ta fi gèɗ a ma malwuɗi nengaʼa, man ta hèshèʼa a ndav ta tèlèba;

³ man ta gi mali azɓai, man ta dè a civèɗ Zhiklè.

⁴ Ka vau ma-bi ngaya, aman ndohi ta da jèjèrèʼa zuraʼa.

⁵ A woy i nzi taraʼa, a i jèjèr ma ngaya man a de nga.

⁶ Aman i co ma nkwèr ngaya tèlèba, i ngècè hori a di azɓai.

⁷ I woy a i shid gèɗ a ndav nzuraʼa, aman i shindè kita ngi-zura ngaya.

⁸ Ma ngaya man a de nga, i jèjèrèʼa. Ka jèkyè a mèdèp bai!

⁹ Gola a slaha a nzi ndzuwaɗaɗaʼa a civèɗ nengaʼa a maya mè? Aman a jèjèr ma ngaya.

¹⁰ I has ka a ndav ga tèlèba. Takahayè, a i da pèkèt ga auda a civèɗ ma nkwèr ngaya ɓai.

¹¹ I gshè ma ngaya te ndav ga, aman i da gi mali a sam ngaya azɓai.

¹² Ndo nzi pèc pècèk, i slebarde ka, sendayè ma ngaya man a de nga!

¹³ Ma ga a ngrédè kita ngaya tèlèba man ka godo.

¹⁴ Ndè a civèɗ ma malwuɗi ngaya a wuffedyè te ndav, a fena skwi mèshèlè tèlèba.

¹⁵ I hérèʼa a gèɗ ma nkwèr ngaya, a i pi di a civèɗ ngaya.

¹⁶ I wuffè a gèɗ ma ngaya man a de nga; ma ngaya a pcèy a gèɗ azɓai.

¹⁷ Gay skwi man amba, i bèl ngaya; a i nzi a nshèffè, a i da jèjèr ma ngaya.

¹⁸ Winay di ga, a i rka nrkedi ma kita ngaya.

¹⁹ I ndo mbrok a gèɗ herkeda. Ka nghede ma nkwèr ngaya a sam ga ɓai!

²⁰ Mpataka kita ngaya a keɗyè pèc pècèk.

²¹ Ka guv ta ndohi nfi va; ndohi man ta jèkeda ma nkwèr ngaya ta phomda.

²² Hori nʼndèrè ndo, a ndohi man ta derɗyè, kaldaussa a sam ga dra! Aman i fu gèɗ a ma malwuɗi ngaya.

²³ Ko bihai ta ɓicè va a ta vhè ma a géda iyè, i ɓèl ngaya, i da hérèʼa a géɗ nrkedi ngaya.

²⁴ Ma malwuɗi ngaya a wuffedyè, ma ngaya man a de nga a ngray maya.

²⁵ Herkeda ntambala a va ga ma; zlatsedyè a ma ngaya!

²⁶ I nje ka civèɗ man i woy a i dè a pa, a ka tsena ma ga. Senday ma ngaya man a de nga!

²⁷ Ngray civèɗ ma nkwèr ngaya, a i hérèʼa a gèɗ nrkedi ngaya.

²⁸ Ndav ga a nʼndha a kuɗa a gèɗ nlèyè. Slambaɗdyè ara man ka goɗ te ma ngaya!

²⁹ Da ncèkèlma auda a sam ga! Vay pomɓai, a ka senday ma kita ngaya!

³⁰ I co civèɗ nzuraʼa auda, i fu ma kita a skwi ga.

³¹ I gso va a ma malwuɗi ngaya. Ndo nzi pèc pècèk, ka pay hori a di ɓai!

³² I hi a civèɗ ma nkwèr ngaya, aman ka winay di ga.

³³ Ndo nzi pèc pècèk, slebday civèɗ ngaya man a de nga, a i jèjèrèʼa, ha ndikè-maʼa.

³⁴ Vay maya a gèɗ, a i ɓir ma kita ngaya, a i jèjèrèʼa a ndav ga tèlèba.

³⁵ Dyè a civèɗ ma nkwèr ngaya! aman nengaʼa ambahayè.

³⁶ Ngalday ndav ga a civèɗ ma malwuɗi ngaya, a civèɗ mwoy skwi ka ɓai!

³⁷ Bezlay di ga auda a sam skwi wi ambalai; vay nshèffè ga a civèɗ ngaya!

³⁸ Gau skwi ara man ka paslay ri te ma ngaya, i bèl ngaya; skwi man ka va ta ndohi man ta gi zlau ngaya.

³⁹ Hori nʼndèrè ndo man i gi zlauaʼa, kaldaussa a sam ga! Aman kita ngaya amba.

⁴⁰ Na haha i woy ma-bi ngaya; vay nshèffè te ngi-zuraʼa ngaya!

⁴¹ Ndo nzi pèc pècèk, pombi ngaya da shkè a géɗ ga, skwi mʼmbel ndo ngaya ara man ka goɗ te ma ngaya.

⁴² A i woy a i mbeɗa na a ma a ndo man a derɗyè; aman i pi ndav ga a ma ngaya.

⁴³ Ka cèmay ma nzuraʼa auda te ma ɓai! Aman i zhèr kita ngaya.

⁴⁴ I woy a i jèjèr ma kita ngaya pèc pècèk, a ma ma a mèdèp.

⁴⁵ Iyè a sam mpraʼa, a i hérèʼa a géɗ ma-bi ngaya.

⁴⁶ I gèɗè ma malwuɗi ngaya a sam bihai, a i gi hori azɓai.

⁴⁷ Ma nkwèr ngaya man i woya kumba a wuffedyè.

⁴⁸ I thè rai a ma nkwèr ngaya, a i hérèʼa a géɗ ma ngaya man a de nga.

⁴⁹ Hur ma man ka gaɗayè, i zhèrèʼa.

⁵⁰ Nasa skwi mbidyè te nlèyè ga; ma ngaya a menay a va.

⁵¹ Ndohi ntsi wai ta ngwossahayè a ta livyè; aman i tawaɗaha ma kita ngaya ɓai.

⁵² I hér kita ngaya man ka bozlo zlèzlèa, Ndo nzi pèc pècèk; a skwi haha a bidyè.

⁵³ Ndav a dzay holholaʼa a géɗ ndohi ambaɓihiaʼa, man ta jèkeda ma kita ngaya.

⁵⁴ Ma ngaya man a de nga nara dimèsh Psaume a sam ga, te gi man a géɗ herkeda man i nzi a pa ara mbrok.

⁵⁵ A vaɗ, i hér nzlembaɗ ngaya, Ndo nzi pèc pècèk; a i jèjèr ma kita ngaya.

⁵⁶ Di man a ga, aman i fi gèɗ a ma-bi ngaya.

⁵⁷ Di man a ga, Ndo nzi pèc pècèk, i gèɗèʼa: i ɓer ma ngaya.

⁵⁸ Ndav ga a woy man ka pakay dai. I da se ka te va, ara man ka goɗ te ma ngaya.

⁵⁹ I hur ma a géɗ civèɗ ga, i ngalda ma a civèɗ ma malwuɗi ngaya.

⁶⁰ I vèsh va, i gi ndudoh azɓai, a njéjèr ma nkwèr ngaya.

⁶¹ I te gadda ndohi ambaɓihiaʼa; aman ma kita ngaya mpcèy a gèɗ ɓai.

⁶² I slèmbèɗè a géɗ vaɗ, aman i shida ka gèɗ, a gèɗ kita ngaya nzuraʼa.

⁶³ I mandal ndohi tèlè man ta gi zlau ngaya, a ndohi man ta fi gèɗ a ma-bi ngaya.

⁶⁴ Ndo nzi pèc pècèk, herkeda nʼndha a pombi ngaya. Senday ma ngaya man a de nga!

⁶⁵ Ka gay skwi man amba, Ndo nzi pèc pècèk, i ɓèl ngaya, ara man ka goɗ te ma ngaya.

⁶⁶ Senday skwi man amba, a i shin nɗèl skwai, te man i co ma nkwèr ngaya a ndav.

⁶⁷ Ga ka manday gèɗ a hai, i zlak ga. Aman antanta i jèjèr ma ngaya.

⁶⁸ Ka amba a ka gi skwi man amba. Senday ma ngaya man a de nga!

⁶⁹ Ndohi nfi va ta ngelay ma a va; aman iyè, i fi gèɗ a ma-bi ngaya a ndav ga tèlèba.

⁷⁰ Ndav tengaʼa nsassaya; aman iyè, i wuffè a géɗ ma kita ngaya.

⁷¹ Amba, aman Zhiklè a manday gèɗ a hai, a i da shindè ma ngaya man a de nga.

⁷² Ma kita ngaya ambahayè, a fena suli gozhèm gozhèm kumba.

⁷³ Ri ngaya a ngiyè, a ntilyè. Vay maya a gèɗ, aman i shindè ma nkwèr ngaya.

⁷⁴ Ndohi man ta gi zlau ngaya, ta da rkayè a ta da wuffè, a géɗ man i zhèr ma ngaya.

⁷⁵ Ndo nzi pèc pècèk, i suna, kita ngaya kita nzuraʼa, a ka manday gèɗ a hi a vava.

⁷⁶ Pombi ngaya da bidyè, ara ma ngaya man ka paslay rai, i ɓèl ngaya.

⁷⁷ I da se ka te va, a i nzi a nshèffè; aman ma kita ngaya a wuffedyè.

⁷⁸ Ndohi nfi va da ngots hori a dai; ta gay matakwan ambalai. Aman iyè, i woy a i hérè a géɗ ma-bi ngaya.

⁷⁹ Ndohi man ta gi zlau ngaya, man ta sun ma malwuɗi ngaya, da shkè a sam ga.

⁸⁰ Ndav ga da rufa ma ngaya man a de nga tèp ba, a i da ngècè hori a di azɓai.

⁸¹ I shèkèt ga a mi skwi mʼmbel ndo ngaya. I zhèrè te ma ngaya.

⁸² Di ga a gwèr na a mwoy ma ngaya, a i gaɗa: Ka da bidyè a ngèmè?

⁸³ Ko i hutèɗ harkangkangaʼa ara kwolala, ma ngaya man a de nga mpcèy a gèɗ ɓai.

⁸⁴ I ɓèl ngaya, i mènè a vata asaɓai; ka da gi kita ndohi mparahayè a ngèmè?

⁸⁵ Ndohi nfi va ta ngay ɓalai a hai. Ma kita ngaya a ngod arsa ɓai.

⁸⁶ Ma nkwèr ngaya tèlèba, ma nzuraʼa. Takahayè! Ta parahayè ambalai, a géɗ skwa ka ɓai.

⁸⁷ Njèkè kèshkata arta zedyè tʼherkeda. Aman iyè, i jèkeda ma-bi ngaya ɓai.

⁸⁸ Vay nshèffè te pombi ngaya, a i fi gèɗ a malwuɗi ngaya te ma ngaya.

⁸⁹ Ndo nzi pèc pècèk, ma ngaya a nzi a mèdèp, a nzi gedeng-gedengaʼa te zhiklè te géɗèʼa.

⁹⁰ Nlèɓèslè ngaya a dè a ma ma a sam wud ndohi tèlèba. Ka dizla herkeɗa, a nengaʼa a nʼnza gedengaʼa.

⁹¹ Skwi man ka tila, a nzi a ma ma; giɗfèk a herkeda, ta bigolahi ngaya.

⁹² Aman ma kita ngaya a wuffedyè azɓai, ar i za te nlèyè ga.

⁹³ Ma-bi ngaya a pcèy a gèɗ azɓai a mèdèp, te man ka zlatsedyè a vna.

⁹⁴ Iyè a ngaya, mbelyè, te man i wuzhè ma-bi ngaya!

⁹⁵ Ndohi ambaɓihiaʼa ta pay va a hai, ta woy a ta zedyè. Aman iyè, i her ma malwuɗi ngaya.

⁹⁶ I rka ndikè-ma skwi tèlèba; aman ndikè-ma ma nkwèr ngaya, azɓai.

⁹⁷ I woya ma kita ngaya a vata ba! I hérèʼa lèk lèk, a hinè a prèk ha dakwaɗ.

⁹⁸ Ma knwèr ngaya a vay maya a gèɗ, a fena man a mayamhi ga; aman nengaʼa a zhè a sam ga pèc pècèk.

⁹⁹ I ngots maya a fena ndohi njèngè ga tèlèba, te man i hèr ma malwuɗi ngaya.

¹⁰⁰ Maya ga a fena maya babgihai, te man i fì gèɗ a ma-bi ngaya.

¹⁰¹ Sak ga a bizhè a civèɗ ambaɓiaʼa azɓai, a géɗ man i jèjèr ma ngaya.

¹⁰² I mindè va ga a deɓa a sam kita ngaya azɓai; aman ka, ka sen-dayè.

¹⁰³ Ma ngaya a jènahayè, a fena vongwom te ma.

¹⁰⁴ Te ma nkwèr ngaya i ngècè maya. Gar haha civèɗ ncèkèlma tèlèba ambahay ɓi pal ba.

¹⁰⁵ Ma ngaya pitirla sak ga, skwi nhelay civèɗ ga.

¹⁰⁶ I mbaɗa, a i da gi ara mʼmbèɗ ga, a i ɓir kita ngi-zura ngaya.

¹⁰⁷ Ka manday gèɗ a hi a vata. Ndo nzi pèc pècèk, vay nshèffè ara man ka goɗ te ma ngaya!

¹⁰⁸ Ndo nzi pèc pècèk, ma mpèsl ri te ma ga da ambaha ka! A ka slebday kita ngaya!

¹⁰⁹ Nshèffè ga a zhè te ri skwi mwuɗitpa pèc pècèk, a ma kita ngaya a pcèy a gèɗ azɓai.

¹¹⁰ Ndohi ambaɓihiaʼa ta ngay ɓali a hai. Aman i zlak ga a sam ma-bi ngaya ɓai.

¹¹¹ Ma malwuɗi ngaya, skwi nʼndi gi ga a mèdèp, a ta wuffedyè te ndav.

¹¹² I ngalda ndav ga pèc pècèk a civèɗ ma ngaya man a de nga, a i jèjèrèʼa, ha ndikè-maʼa.

¹¹³ I gi shèwa a ndohi man ta pi gèɗ cèw, i woy ma kita ngaya a ndav ga.

¹¹⁴ Ka sam ga nlèaʼa, gambar ga, i zhèrè te ma ngaya.

¹¹⁵ Kinè ndohi ambaɓihiaʼa, va-kazlay auda a tsagai, a i jèjèr ma nkwèr Zhiklè ga!

¹¹⁶ Zlatsedekay auda ara man ka paslay ri te ma ngaya, a i nzi a nshèffè. Ka dzakaɓamay gèɗ a géɗ skwi man i zhèrè te ndav ɓai!

¹¹⁷ Vay wuɗai, a i mbel ga; a i woy a i pi di a ma ngaya man a de nga pèc pècèk.

¹¹⁸ Ndohi tèlèba man ta zlak ta dra a sam ma ngaya man a de nga, ka kwol ta, te man skwi man ta hérèʼa, skwi ncèkèlma.

¹¹⁹ Ndohi ambaɓihiaʼa tʼherkeda tèlèba, ka rka ta ara keli züdo. Gar haha i woy ma malwuɗi ngaya.

¹²⁰ Zlau ngaya a slambaɗday gwots gelaki a va; i gi zlau kita ngaya.

¹²¹ I gau kita zuraʼa a vava. Ka viyè a ri ndohi nʼngay matakwan ɓai!

¹²² Nzakay a deɓa, i ɓèl ngaya! Ndohi nfi va da gay matakwan ɓai!

¹²³ Di ga ngworaʼa a mwoy skwi mʼmbel ndo ngaya, a ma ngi-zuraʼa ngaya.

¹²⁴ Vay pombai, i ɓèl ngaya! Senday ma ngaya man a de nga!

¹²⁵ I ɓèl ngaya, vay maya, a i sun ma malwuɗi ngaya!

¹²⁶ Ndo nzi pèc pècèk, tidè sam nshkè ngay ma; ta ta waɗaha ma kita ngaya.

¹²⁷ Gar haha i woy ma nkwèr ngaya a ndav ga, a fena guro, guro ndaɓalaʼa.

¹²⁸ Gar haha i dzodzor ma ngaya man a de nga tèlèba, civèɗ ncèkèlma tèlèba ambahay ɓi fèt ba.

¹²⁹ Ma malwuɗi ngaya, nrkedai. A géɗ nengaʼa ndav ga a ɓerèʼa.

¹³⁰ Mpèr ma auda te ɗèlèwèr ngaya a winè dai, a va ta maya a ndohi man maya ta a hcè.

¹³¹ I winè ma ga furraʼa, a i shèffè hatevhatevaʼa, aman mi ma nkwèr ngaya a keɗyè.

¹³² Pakay dai, i da se ka te va! Ara man ndohi man ta woy ka, amba aman a ta ngotso.

¹³³ A verzi ma ngaya nga dè gedeng-gedengaʼa. Mali mèmè da gu bi a géɗ nga ɓai!

¹³⁴ Prekay auda te ri ndo nʼngay matakwan, a i fi gèɗ a ma-bi ngaya.

¹³⁵ Di ngaya da hela na sam a ɓèl ngaya. Senday ma ngaya man a de nga!

¹³⁶ Kuɗa a panamay ndav, a géɗ ndohi man ta jèjèr ma kita ngaya azɓai.

¹³⁷ Ndo nzi pèc pècèk, ka zuraʼa, kita ngaya nzuraʼa.

¹³⁸ Ka vau ma malwuɗi ngaya a skwi nzuraʼa a vava.

¹³⁹ Srak a keɗyè a vara, a géɗ man ma ngaya a mpce ta a gèɗ a ndohi mayamhi ga.

¹⁴⁰ Ma ngaya njkeda klèng ma a vava. I ɓèl ngaya i woyaʼa a ndav ga.

¹⁴¹ I ndo nkèshèa a ta derɗyè; aman ma-bi ngaya a pcèy a gèɗ azɓai.

¹⁴² Ngi-zura ngaya, ngi-zuràʼa a mèdèp. Ma kita ngaya, ma nzuraʼa.

¹⁴³ Zlau, zlau mʼmetsai a dzaye, aman ma nkwèr ngaya a wuffedyè.

¹⁴⁴ Ma malwuɗi ngaya zuraʼa a mèdèp. Vay maya a i nzi a nshèffè.

¹⁴⁵ Ndo nzi pèc pècèk, i baha ka a ndav ga tèlèba, mbeɗkay a ma! A i jèjèr ma ngaya man a de nga.

¹⁴⁶ I baha ka, mbelyè, a i fi gèɗa ma malwuɗi ngaya.

¹⁴⁷ Ga sam a ciɗè, i bèhè, a i zhèrè te ma ngaya.

¹⁴⁸ I nzi a dai a vaɗ, a i hérè a géɗ ma ngaya.

¹⁴⁹ T sena daʼai ga a géɗ pombi ngay a! Ndo nzi pèc pècèk, vay nshèffè te mwoy ndo ngaya!

¹⁵⁰ Ndohi man ta parahayè ta herdakay va a shèwa tengaʼa; aman ta jèkeda ma kita ngaya.

¹⁵¹ Ndo nzi pèc pècèk, ka zhè ndul ndul. Ma nkwèr ngaya tèlèba, ma nzuraʼa.

¹⁵² I sun ma malwuɗi ngaya zlèzlèa, i suna, ka fau aman a nzi a mèdèp.

¹⁵³ War nlèyè ga, prekay auda! Ma kita ngaya mpcèy a gèɗ ɓai.

¹⁵⁴ Nzay a deɓa, sumkay a deɓa, vay nshèffè ara man ká goɗ te ma ngaya!

¹⁵⁵ Skwi mʼmbel ndo a zhè dra a sam ndohi ambaɓihiaʼa, te man ta hér ma ngaya man a de nga azɓai.

¹⁵⁶ Ndo nzi pèc pècèk, ndo a se ka te va kumba; vay nshèffè te kita ngaya!

¹⁵⁷ Ndohi kumba man ta parahayè a ta gay matakwan, i pèkèt ga a sam ma malwuɗi ngaya ɓai.

¹⁵⁸ I rka ta ndohi ngi rai, a ta ndarayè, a géɗ man ta fi gèɗ a ma ngaya azɓai.

¹⁵⁹ Wora, i woy ma-bi ngaya kumba, Ndo nzi pèc pècèk, vay nshèffè te pombi ngaya!

¹⁶⁰ Verzi ma ngaya ma nzuraʼa. Kita ngi-zura ngaya a nzi a mèdèp.

¹⁶¹ Wud bihai ta parahayè ambalai, a géɗ skwi ka ɓai; aman zlau ma ngaya a dzay te ndav.

¹⁶² Ndav ga a wuffè a géɗ ma ngaya, ara ndo man a dumko skwi kumba.

¹⁶³ Ncèkèlma ambahay ɓi fèt ba, a ndarayè; aman ma kita ngaya ambahayè.

¹⁶⁴ I shida ka gèɗ sak tsaraɗ a pats staɗ, a géɗ kita ngaya zuraʼa.

¹⁶⁵ Ndohi man ta woy ma kita ngaya, gumi a zhè a sam ta kumba. Skwa a slafaɗama ta sak azɓai.

¹⁶⁶ Ndo nzi pèc pècèk, i zhèr skwi mʼmbel ndo ngaya, a i gi ara man ma nkwèr ngaya a gaɗa.

¹⁶⁷ Ndav ga a fi gèɗ a ma malwuɗi ngaya, a i woya kumba.

¹⁶⁸ I fi gèɗ a ma nkwèr ngaya a ma malwuɗi ngaya, te man civèɗ ga tèlèba a zhè a sam di ngaya.

¹⁶⁹ Ndo nzi pèc pècèk, kuɗ ga do do a sam ngaya, vay maya te ma ngaya!

¹⁷⁰ Ntsi ri ga da ndikè a sam ngaya, prekay auda ara man ka goɗ te ma ngaya!

¹⁷¹ Ma ga da slebarde ka! Te man ka senday ma ngaya man a de nga.

¹⁷² Ma gaɗa slu dimèsh a géɗ ma ngaya, aman ma nkwèr ngaya tèlèba zuraʼa.

¹⁷³ Ri ngaya da takahayè, te man i co ma-bi ngaya.

¹⁷⁴ Ndo nzi pèc pècèk, i woy skwi mʼmbel ndo ngaya, ma kita ngaya a wuffedyè.

¹⁷⁵ Ndav ga da nza a nshèffè, a i slébèrdè ka, a kita ngaya da takahayè te pa!

¹⁷⁶ I zlak ga ara tambak man a ze na; hassyè, i ɓèl ngaya, te man ma nkwèr ngaya mpcèy a gèɗ ɓai!