Psaumes 118 - Ma Zhiklè

¹ Va-shüd gèɗ a Ndo nzi pèc pècèk, aman nengaʼa amba; aman pombi nengaʼa a nzi a mèdèp.

² Ndohi gi Israel da goɗ aranta: aman pombi nengaʼa a nzi a mèdèp.

³ Ndohi gi Aaron da goɗ aranta: aman pombi nengaʼa a nzi a mèdèp.

⁴ Ndohi man ta gi zlau Ndo nzi pèc pècèk, da goɗ aranta: aman pombi nengaʼa a nzi a mèdèp.

⁵ Te va zlau mʼmetsai man a gayè, i tsu ri a Ndo nzi pèc pècèk, a nengaʼa a mʼmbeɗkay a ma, a nckay auda.

⁶ Ndo nzi pèc pècèk, nga a vna, i gi zlau azɓai. Ndo a siaha a ngay mè?

⁷ Ndo nzi pèc pècèk nengaʼa man a takahayè, i da fen ta ndohi man ta gay shèwa.

⁸ Dara man nga gshè va a Ndo nzi pèc pècèk, a géɗ man nga gshè va a ndo.

⁹ Dara man nga gshè va a Ndo nzi pèc pècèk, a géɗ man nga gshè va a ndohi mbibihiaʼa.

¹⁰ Ndohi nte deɓa ta tèudyè a pa tèlèba; aman a nzlembaɗ Ndo nzi pèc pècèk i zede ta.

¹¹ Ta tèudyè a pa, ta derzlyè a pa; aman a nzlembaɗ Ndo nzi pèc pècèk i zede ta.

¹² Ta ngezlay a va ara vong-wom, ta ndev ta ara vogwa vatak; aman a nzlembaɗ Ndo nzi pèc pècèk i zede ta.

¹³ Ta zukdyè, ta woy a ta kaldyè a hai, aman Ndo nzi pèc pècèk a ntakahayè.

¹⁴ Ndo nzi pèc pècèk, nengaʼa wuɗi ga a dimèsh man i slébèrdèʼa a vna. Nengaʼa nʼngaʼa a skwi mbelyè.

¹⁵ Nhèzlèwè mwuffè a ntsi sabi mwuffè a cinè te gi ndohi nzuraʼa; ri mandi Ndo nzi pèc pècèk a ngul skwai!

¹⁶ Ri mandi Ndo nzi pèc pècèk a gi skwi mbiaʼa; ri mandi Ndo nzi pèc pècèk a ngul skwai!

¹⁷ Halau, i da metsi ga azɓai, i da nzi a nsheffè, a i da njè skwi man Ndo nzi pèc pècèk a giaʼa.

¹⁸ Ndo nzi pèc pècèk a ngezyè, a ngatsay maya aman a viyè a ri mʼmetsi ka bai.

¹⁹ Va-winay ntamagi ngi-zuraʼa! I da bizhè a pa, a i da shid gèɗ a Ndo nzi pèc pècèk.

²⁰ Ntamagi Ndo nzi pèc pècèk a nta, ndohi nzuraʼa ta bizhè a pa.

²¹ I shida ka gèɗ, a gèɗ man ka tsena ntsi ri ga, a ka mbelyè.

²² Kwa man ndohi ndizlè gai ta kwolaʼa, nʼngaʼa a kwa nte verziaʼa.

²³ Skwi haha Ndo nzi pèc pècèk a giaʼa, nrkedi a sam di nga.

²⁴ Na haha pats man Ndo nzi pèc pècèk a gau. Ngo-gokoy langlangaʼa, ngo-wuffokoya!

²⁵ Wa Ndo nzi pèc pècèk, mbel nga genè! Wa Ndo nzi pèc pècèk, takaha nga genè, aman skwi nga a gi amba!

²⁶ Nga slébèrdè nengaʼa man a shkè a nzlembaɗ Ndo nzi pèc pècèk. Nga pshè kinè ma, te man nga shkè te gi Zhiklè.

²⁷ Ndo nzi pèc pècèk, nengaʼa Zhiklè, nengaʼa a hela ndav nga. Va-berzlda vah a rai, ha ndè a sam dromhi sam mvi skwi a Zhiklè.

²⁸ Ka Zhiklè ga, i woy a i shida ka gèɗ. Bi Zhiklè ga, i woy a i nzal ka.

²⁹ Va-shüd gèɗ a Ndo nzi pèc pècèk, aman nengaʼa amba; aman pombi nengaʼa a nzi a mèdèp.