Psaumes 115 - Ma Zhiklè

¹ Ka nzal nga ɓai, ka nzal nga ɓai, Ndo nzi pèc pècèk! Aman nzala nzlembaɗ ngaya staɗ genè, a gèɗ pombi a nlèɓèslè ngaya!

² Ndohi nte deɓa da goɗ: kos Zhiklè tengaʼa tema, ɓai!

³ Zhiklè nga a zhè te zhiklè te géɗèʼa, skwi tèlèba man a woyaʼa, a giaʼa.

⁴ Zhiklèhi mbèh skwi tengaʼa ta ga a kwa a rɓasl, ndo a ngu a ri na.

⁵ Ma tengaʼa a zhè; ta gèɗè a vna azɓai. Di tengaʼa a zhè; ta rka skwa a vna ɓai.

⁶ Zlembaɗ tengaʼa a zhè; ta tsena skwa a vna ɓai. Htsan tengaʼa a zhè; skwa a zhkèha ta a vna azɓai.

⁷ Ri tengaʼa a zhè; ta gi skwa a vna azɓai. Sak tengaʼa a zhè; ta dè a vna azɓai. Daʼai tengaʼa a cinè azɓai.

⁸ Ndohi nʼnge ta, ta lèmèlèmè ara skwihi sa, a tengaʼa tèlèba man ta fu gèɗ a vna!

⁹ Ndohi Israel, va-pu ndav a Ndo nzi pèc pècèk! Nengaʼa a takaha ta, nengaʼa gambar ta.

¹⁰ Ndohi gi Aaron, va-pu ndav a Ndo nzi pèc pècèk! Nengaʼa a takaha ta, nengaʼa gambar ta.

¹¹ Kin tèlèba man kin gi zlau Ndo nzi pèc pècèk, va-pu ndav a Ndo nzi pèc pècèk! Nengaʼa a takaha ta, nengaʼa gambar ta.

¹² Ndo nzi pèc pècèk a hér nga: a da pshè nga ma. A da pshè ta ma ndohi gi Israel. A da pshè ta ma ndohi gi Aaron.

¹³ A da pshè ta ma ndohi man ta gi zlau Ndo nzi pèc pècèk, nkèsh-kèshèhiaʼa a mbibihiaʼa.

¹⁴ Ndo nzi pèc pècèk da de kine a ma ma, kinè a wudahi kinè!

¹⁵ Ndo nzi pèc pècèk da pshè kinè ma, nengaʼa man a gu giɗfèk a herkeda!

¹⁶ Giɗfèk, skwi Ndo nzi pèc pècèk; aman herkeda, a va ta a ri a wud ndohai.

¹⁷ Ndohi mʼmetsaʼa ta slébèrdè Ndo nzi pèc pècèk azɓai; ko tengaʼa ba man ta te gi dzavai.

¹⁸ Aman nga, nga slèbèrdè Ndo nzi pèc pècèk, a hinè antanta a ndè a ma ma a mèdèp. Alléluia!