Psaumes 114 - Ma Zhiklè

¹ Aman ndohi Israel ta shkè auda te kokwar Egypte, a ndohi Jacob ta shkè auda te va ndohi man daʼai ta tsaɗ,

² Juda nʼngaʼa a sam nengaʼa nkezlaʼa; Israel nʼngaʼa a kokwar-bi na.

³ Iyam mbiaʼa a nzlats na hai, woyam Jourdain a nʼngwoda gèɗ na a deɓa.

⁴ Zahi ta nzevau ara drokihai, a ngègèdhi ta tsu ɓarwasl ara wud tambakihai.

⁵ Ka iyam mbiaʼa, ka mende va ngaya a deɓa èhèmè? Jourdain, ka ngwode gèɗ ngaya a deɓa èhèmè?

⁶ Zahi, kin nzevau ara drokihai èhèmè? Ngègèɗhai, kin tsu ɓarwasl èhèmè?

⁷ Herkeda, gudzau a sam di Ndo nzi pèc pècèk, a sam di Zhiklè Jacob!

⁸ Nengaʼa man a nʼngwoda za a woyam mbiaʼa, a nlèlè iyam a nhakaɗauda a gi krengaz.