Psaumes 111 - Ma Zhiklè

¹ Allëluia! I woy a i shida na gèɗ a Ndo nzi pèc pècèk a ndav ga tèlèba, te ndev ndohi nzuraʼa, te ndev mpi ndohai.

² Skwi man Ndo nzi pèc pècèk a giaʼa, skwi mbiaʼa; ta tèlèba man ta wuffè a géɗèʼa, ta hérè a géɗèʼa.

³ Nʼnjèlè a nʼnjèl-bai, nasa skwi man a giaʼa; a ngi-zuraʼa nengaʼa a nzi a mèdèp.

⁴ A ngeda nrkedi nengaʼa aman a ta hérèʼa. Ndo nzi pèc pècèk a woy ndo, a ndo a sia te va.

⁵ A va ta skwi nʼndai a ndohi man ta gi zlauaʼa, a hér nderzlè-ma nengaʼa a mèdèp.

⁶ A ngreda ta wuɗi nengaʼa auda a sam ndohi na, a pats man a mva ta ndohi herkeda a skwi nʼndi gai.

⁷ Skwi man ri nengaʼa a giaʼa, skwi nzuraʼa a vava; ma kita nengaʼa tèlèba a fshè-wa azɓai.

⁸ Ta nzi taraʼa pèc pècèk a mèdèp, a gi arsa a vava zuraʼa.

⁹ A nzlinda skwi mpil gèɗ a ndohi na, a mva ta nderzlè-ma nengaʼa a mèdèp. Nzlembaɗ nen-gaʼa nkezlaʼa, mwuɗitpa.

¹⁰ Maya a hinkaɗi te ngi zlau Ndo nzi pèc pècèk. Ndohi man ta gi arsa, ta gu amba. Nʼnjèl nengaʼa a nzi a mèdèp.