Psaumes 110 - Ma Zhiklè

¹ Psaume David. Ndo nzi pèc pècèk a gaɗa na Bi ga: Nzahai te civèɗ ri mandi ga, ha pats man i ge ta ndohi mayamhi ngaya a skwi nfi sak ngaya.

² Ndo nzi pèc pècèk a da gedè gaɗa bi ngaya nʼnzalaʼa te Sion. Gau bi te ndev ndohi mayamhi ngaya!

³ Ka bi te nyekad ngaya, a nʼnjèlè nkezlaʼa. A pats man ka jèkeda wa mam ngaya, wuɗi gola ngaya a zhè ma.

⁴ Ndo nzi pèc pècèk a mʼmbaɗa, nengaʼa a ngwèdè ma na azɓai. Ka ndo mvi skwi a Zhiklè a mèdèp, lèmèlèmè ara Melchisédek.

⁵ Bai, Zhiklè, a zhè te civèɗ ri mandi ngaya, a wushedeka ta bihi auda te bai, a pats ndzoan nengaʼa.

⁶ A gi kita kokwar bihi herkeda: kokwar nʼndha a nckondo-hai, man a batsama ta gèɗ a ta bazl ta a géɗ herkeda.

⁷ A da si iyam te woyam a civèɗ, gar haha a da ced gèɗ a zhiklè.