Psaumes 109 - Ma Zhiklè

¹ Psaume David. Zhiklè, man i slébèrdè ka, ka nze tètè ɓai!

² Ndohi ambaɓihiaʼa ta cèkèlma a géɗ ga, ta zlyè a hi a ma.

³ Ta mbay va a gèɗ a ma shèwa, ta woy maʼa iyè ambalai.

⁴ Mwoy man i woy ta, tengaʼa ta gi a ndohi mayamhi ga. Aman iyè, i tsi ri a Zhiklè!

⁵ Skwi man i ga ta amba, ta pelayè a skwi man ambaɓai; mwoy man i woy ta, ta pelayè a skwi man ambaɓai; mwoy man i woy ta, ta pelayè a shèwa.

⁶ Skwi ambaɓiaʼa da ngwoda na va a gèɗ a ndo mayam; ndo ngshèʼa da zlatsa a sám na te civèɗ ri mandai.

⁷ Kita da gso, kuɗ nengaʼa da gu a skwi mali na.

⁸ Pats nshèffè na da herdaha va na, ndo ngiɗè da co mizlinè nengaʼa.

⁹ Wudahi nengaʼa da nda a wud dikai, ngwoz nengaʼa da nda a ngwoz mazai.

¹⁰ Wudahi nengaʼa da sawala a dala a ta hèsh skwi tʼhai am-ɓalai, da dzam ta auda te diki bab ta.

¹¹ Ndo mvi skwi a slembelom da helama na skwai, a ndohi man verzi ta tsaɗ da cèma na skwi ntul na.

¹² Ndo da keɗa na gèɗ ɓai! Wud diki nengaʼa da su ndo te va ɓai!

¹³ Ndohi te verzi nengaʼa da ndev ta, nzlembaɗ nengaʼa da ze na a sam ndohi te verzi nengaʼa.

¹⁴ Ndo nzi pèc pècèk da hur mali bababhi nengaʼa, a mali mam na da da pana ɓai!

¹⁵ Mali tengaʼa da zhè a sam di Ndo nzi pèc pècèk lèk lèk, da gedassa nzlembaɗ nengaʼa tʼherkeda, a ta hér nengaʼa asaɓai.

¹⁶ A géɗ man a gaɗa a woy ndo ɓai; a paraha mbelaw ndo, a ndo ntawassaʼa, a woy a zede ndo main ndav nengaʼa a mbeɗè.

¹⁷ Mphömdè-ndo man ambaha sa, da ngwoda na va a gèɗ! Mpshè-ma man a woya ɓi sa, do do dra a sam na!

¹⁸ A mfu mphömdè-ndo a maslaka na. Ma mphomdaʼa do do a va nengaʼa ara iyam, do do a va vatasl nengaʼa ara mbar.

¹⁹ Da gu a sam na ara maslaka man a fi a va, ara skwi deɓa man a manda deɓa.

²⁰ Skwi háha da gu a skwi ntul ndohi mayamhi ga, a tengaʼa man ta gèɗè ma ambaɓiaʼa a géɗ ga.

²¹ A ka, Bai, Ndo nzi pèc pècèk, nza a nda iyè a géɗ nzlembaɗ ngaya! Mbelyè a géɗ pombi ngaya man amba!

²² Iyè, i mbelawa, i ndo ntawassaʼa, i gi zlau te ndav tʼhwaɗaʼa.

²³ I ndev ga ara mèzhèɓ man a nʼndev na, i ara dzarai man ta mbèlèʼa.

²⁴ Njèkè skwi nʼndai a pay gudɓi a di sak. Va ga a hezak na a i gwor ga.

²⁵ I ndaʼa a skwi man a ndara ta; aman ta rkayè, ta giɗè gèɗ kwotakwo-taʼa.

²⁶ Ndo nzi pèc pècèk, Zhiklè ga, takahayè, mbelyè a pombi ngaya.

²⁷ A ta suna, ri ngaya a ngau, ka Ndo nzi pèc pècèk, ka ngau.

²⁸ Aman tengaʼa ta dérɗè ndo, – ka, ka pshè ma; a ndohi mpinyè ta ngècè hori a dai; aman ɓèl ngaya da ngots mwuffè.

²⁹ Aman gèɗ ndohi mayamhi ga da dzakaɓ na, hori da pad ta pa ara maslaka.

³⁰ I da slébèrdè Ndo nzi pèc pècèk a vata, a i da shida na gèɗ te ndev ndohi rèdèdèa.

³¹ Aman nengaʼa a nza na a deɓa a ndo ntawassaʼa, aman a mbelaʼa te ri ndohi man ta ga na kita a gèɗ.