Psaumes 108 - Ma Zhiklè

¹ Dimèsh. Psaume David.

² Bi Zhiklè, ndav ga mʼmana-tʼhai. I woy a i sli dimèsh nslèbèrdè Zhiklè a deɓ ganzavar.

³ Ganga a ganzavar, va-slha! I woy a i baha na nhèl sam prèk.

⁴ Ndo nzi pèc pècèk, i woy a i shida ka gèɗ te ndev ndohi herkeda. I woy a i sli dimèsh a ka, te ndev kokwar bihai.

⁵ Aman pombi ngaya mbiaʼa, a dè zhiklè, nlèɓèslè ngaya mbiaʼa, a dè a va vanai.

⁶ Bi Zhiklè, da nza a géɗèʼa, ngreda nʼnjèl ngaya auda a sam herkeda tèlèba!

⁷ A ndohi man ka woy ta, ta da mbel ta. Takaha nga a ri mandi ngaya, mbeɗka nga a ma!

⁸ Bi Zhiklè a gaɗkaɗa a sam nengaʼa nkezlaʼa: I wuffè, i woy a i kezli kokwar Sichem, a i livè dal Succoth.

⁹ Galaad a ga, Manassé a ga, Ephraim dzokwom ga, Juda gaɗa-bi ga.

¹⁰ Moab torok mpèn va ga. Edom, i zlaɓaʼa a ko-tokoroh ga. I woy a i tsi sabi a géɗ kokwar Philistie.

¹¹ A ndyè a sam gi ndakmaʼa wa? A mfeday ma a Edom wa?

¹² Man ka Bi Zhiklè kla, ka man ka kwol nga, ka Bi Zhiklè man anai ka dè var a verzi nga asaɓai.

¹³ Takaha nga a sam ndohi nʼnga nga mtakwan; aman skwi man ndohi ta takaha nga a vna, skwi ambalai.

¹⁴ Nga da gi skwi mbiaʼa a nda Bi Zhiklè, nengaʼa a da mbatsaha ta ndohi nʼnga nga matakwan a sak.