Psaumes 107 - Ma Zhiklè

Ɗèlèwèr mazlamaʼa

¹ Va-shida na gèɗ a Ndo nzi pèc pècèk, aman nengaʼa amba, a mwoy-ndo nengaʼa a nzi a mèdèp.

² Ndohi man Ndo nzi pèc pècèk a sumka ta a deɓa, da goɗ arsa; tengaʼa man a sumka ta a deɓa te ri mayamhai;

³ tengaʼa man a ɓicka ta a deɓa tʼherkeda te civèɗ mvèng pats, te civèɗ nkèl pats, te man a tsagi a tsagai.

⁴ Ta zlak ta tʼhèshèkèɗ, te ndev tsohi-tsoh, a ta ngatsa civèɗ aman a ta nzi a kokwar ɓai,

⁵ mi a nkeɗ ta, iyam a ndza ta, a ndav ta a mʼmbeɗ na.

⁶ Te deɓaʼa te va matakwan tengaʼa ta kuɗau a sam Ndo nzi pèc pècèk, a nengaʼa a nhelka ta auda te ri zlau mʼmetsai,

⁷ a de ta a civèɗ zuraʼa a ta dè aman a ta nzi a kokwar.

⁸ Sèi ta shida na gèɗ a Ndo nzi pèc pècèk a géɗ mwoy-ndo nengaʼa, a géɗ nrkedi nengaʼa man a gi a sam wud ndohai.

⁹ A ngu aman ndav ta langlangaʼa, a ndav ta ntasla latsatsaʼa.

¹⁰ Tengaʼa man ta nza te ruva, te va mʼmetsai, nlèyè a ndzaw ta, teɓa züdo a ndzaw ta,

¹¹ a géɗ man ta gu mèdègèɗ a géɗ ma Zhiklè, a ta kwola skwi man Zhiklè te géɗèʼa a hur a da giaʼa;

¹² a Zhiklè a mva ta skwi mwuɗitpa a mbedama ta ndav, a kalde ta a hai, ndo ntakaha ta te deɓaʼa asaɓai.

¹³ Te deɓaʼa te va matakwan tengaʼa ta kuɗau a sam Ndo nzi pèc pècèk, a nengaʼa a nhelka ta auda te ri zlau mʼmetsai.

¹⁴ A nhelka ta auda te ruva, te va mʼmetsai, a nʼngesla skwi ndzaw ta.

¹⁵ Sèi ta shida na gèɗ a Ndo nzi pèc pècèk a géɗ mwoy-ndo nengaʼa, a géɗ nrkedi nengaʼa man a gi a sam wud ndo-hai.

¹⁶ Aman nengaʼa a nkuratsa ntama-gi züdo, a mpasla skwi mɓèr ntamagi züdo.

¹⁷ Ndohi nrzlaʼa, a civèɗ mali ta, a skwi man ambaɓai man ta giaʼa, ta gi matakwan a va ta a ri ta.

¹⁸ Ko skwi nʼndai a ndara ta, ta zhuwaʼa a ma gi dzavai.

¹⁹ Te deɓaʼa te va matakwan tengaʼa ta kuɗau a sam Ndo nzi pèc pècèk, a nengaʼa a nhelka ta te ri zlau mʼmetsai.

²⁰ A nzlinda ta ma nengaʼa, aman a mbel ta dzafdzafaʼa, aman a ɓer nshèffè ta te ri skwi man a gedas ta.

²¹ Sèi ta shida na gèɗ a Ndo nzi pèc pècèk a géɗ mwoy-ndo nengaʼa, a géɗ nrkedi nengaʼa man a gi a sam wud ndohai.

²² Sèi ta zla na skwi aman ta shida na gèɗ a vna, a ta njè skwi man a gau auda a mwuffè.

²³ Tengaʼa man ta shèwèlè te wurom a géɗ iyam mbiaʼa, a ta da gi gani a géɗ iyam,

²⁴ tengaʼa ta rka skwi man Ndo nzi pèc pècèk a gau, ta rka nrkedi nengaʼa tʼhwaɗ iyam.

²⁵ Nengaʼa a prè ndombozlor, a slambadda iyam,

²⁶ a tengaʼa ta dè a géɗèʼa, a ta wush ta hi a drav, a nʼngwodama ta ndav;

²⁷ a tèwèlèma ta gèɗ a ta dè ara ndohi zom man a keɗ ta. Maya tengaʼa a nze na.

²⁸ Te deɓaʼa te va matakwan tengaʼa ta kuɗau a sam Ndo nzi pèc pècèk, a nengaʼa a nhelka ta te ri zlau mʼmetsai.

²⁹ A mʼmanda na gèɗ a hi a ndombozlor, a iyam a nʼnza géɓitèʼa.

³⁰ Ta wuffè aman iyam a giɗè va asaɓai, a Zhiklè a nde ta a dzah woyam man ta woyaʼa.

³¹ Sèi ta shida na gèɗ a Ndo nzi pèc pècèk a géɗ mwoy-ndo nengaʼa, a géɗ nrkedi nengaʼa man a gi a sam wud ndohai.

³² Sèi ta nzalaʼa a sam mpi ndohai, a ta shida na gèɗ a sam ncèmma ndohi nhalaʼa.

³³ A nʼngwode woyamhi a hèshèkèɗ, a nlèlè iyamhai a tazli hèshèkèɗ.

³⁴ Sam gi dau mbelaʼa a gi a matandaz, a gèɗ mali ndohi man ta nza a pa;

³⁵ aman nengaʼa a nʼngwode hèshèkèɗ a sam man iyam a pa, sam man iyam az a pa ɓai a nlèlè iyam.

³⁶ A mpe ta ndohi man mi a keɗ ta a pa, a ta gi kokwar ta a pa.

³⁷ A ta zleki gi dau a ta gi gi-lak, a ta ngècè skwi nʼndai te pa.

³⁸ A pshè ta ma, a ta mènè a vata, a va ta skwi kudom a vata.

³⁹ Te deɓaʼa a géɗ matakwan a nlèyè man a zhida ta gèɗ a hai, ta hohoy ta.

⁴⁰ Nengaʼa man a derɗ ta ndohi mbibihiaʼa, a gi aman ta zlak ta a ndev hèshèkèɗ kurndazlnda-zlaʼa, man civèɗ a te pa ɓai.

⁴¹ Nengaʼa man a zlatsede ndo ntawassaʼa auda te ntèwèshè nengaʼa, a verzi nengaʼa a gi rè-dèdèa ara skwi kudom.

⁴² Ndohi nzuraʼa ta rkaʼa, a ta wuffè; a ntseda ta ma a pa, a ndohi ncèkèlma tèlèba.

⁴³ Ndo wawa man maya na zhè, da hur skwi haha, da sun pombi Ndo nzi pèc pècèk!