Psaumes 104 - Ma Zhiklè

¹ Ndav ga, slubordo Ndo nzi pèc pècèk! Ndo nzi pèc pècèk, Zhiklè ga, ka mbiaʼa, nʼnjèlè a nʼnjèl-bai a va ngaya;

² ka mbè te skwi nhél sam ara maslaka; ka wuzhè giɗfèk ara mpèpèy gai;

³ ka pi balak a géɗ iyam; ka gi vani a kiki ngaya; ka hi te va kozlar,

⁴ kozlar ndo sak ngaya, vogwa man a ndi skwai, ndohi mizlinè ngaya.

⁵ Ka voko skwi a, verzi herkeda, aman a giɗè va azɓai a mè-dèp.

⁶ Tʼhinkaɗ herkeda, iyam a mpizlè-da pa ara maslaka, ko zahi ba ntʼhwaɗ iyam.

⁷ Aman ka güvèʼa, a ngél na, a sam ntsi iyam ngaya a daha va na auda.

⁸ A za a tsoko gèɗ auda, a nkulgodok tʼhai, a sam man ka woy ta a pa.

⁹ Ka nga ta kuma, ta slaha ta tèwèdè a pa asaɓai, a mèdèp iyam a slaha a nzede herkeda te deɓaʼa asaɓai.

¹⁰ Ka winè nlèlè iyam a hai a nkulgodok, a ta hi te ndev za.

¹¹ Skwi dak a ngè-cè iyam nsi te pa, zluèɗ dak a si iyam te pa,

¹² a diakihi tʼhwaɗ giɗfèk ta nzi a ma iyam, a ta kuɗi tʼhwaɗ wof.

¹³ Ka ɓalka ta iyam a zahai a balak ngaya, vani ngaya a ruɓ herkeda.

¹⁴ Ka gi aman kuza a fcè, a skwi ndzhamhai ta ndiaʼa; a lak, a ndo-hai ta ndiaʼa, a ta ngècè skwi nʼndai auda tʼherkeda.

¹⁵ A barassa a wuffedè ndav ndo, a mbar a shüd ndo wuzlwuzlaʼa, a movar a vi wuɗi a ndo.

¹⁶ Wofhi Ndo nzi pèc pècèk ta ngaza, wofhi te Liban, wof tsna man a nʼngeda pa,

¹⁷ a sam man ngalawihi ta gi gi ta a pa, a massai man a gi gi na te wof mbotomboto.

¹⁸ Za ngurèa, ɓok za te pa; te slrats za, hupathi a ta nghédè va a pa.

¹⁹ A ngau kia, a ngrè mvai. Pats a sun sam nkèl na.

²⁰ Ka gi ruva, a vaɗ a ngai. Skwi dakhi tashèwèlèa vaɗ.

²¹ Wud marizhèlèhai ta kuɗi zluèɗ, ta hèsh skwi nʼndi te ri Zhiklè.

²² A pats a shkè auda, ta nghede va ta, a ta mènè a gi za.

²³ A ndo a shkè auda te gai, a gi skwi na, a gi mizlinè na ha dakwaɗ.

²⁴ Ndo nzi pèc pècèk, skwi man ka giaʼa kumba! Ka gau tèlèba a maya ngaya. Herkeda nʼndha a skwi man ka gau.

²⁵ Iyam mbiaʼa, a dè dra, a kèlè drav. Skwi a shèwèlè te pa a ngrè azɓai, skwi nkèshèʼa a skwi mbiaʼa.

²⁶ Wuromhi ta, shèwèlè a géɗèʼa, skwi nara kedam a mbèhwali tʼhwaɗaʼa.

²⁷ Ta tèlèba ta zhèr ka, aman ka va ta skwi nʼndai, man tiɗè samaʼa.

²⁸ Aman ka va ta, ta ɓicè skwai. Aman ka winè ri ngaya, ta ngézhè a skwi man amba.

²⁹ Aman ka nghede va ngaya ta gi zlau; aman ka cèma ta nshèffè, ta bazl ta, a ta minè a deɓa a va mberfenèk.

³⁰ Aman ka ftè nshèffè ngaya, ta zhè a nshèffè, a ka ngwèdè herkeda a mɓuaʼa.

³¹ Nʼnjèl Ndo nzi pèc pècèk da nza a mèdèp! Ndo nzi pèc pècèk da wuffa a géɗ skwi man ri nengaʼa a gau.

³² Nengaʼa a pi di a herkeda, a herkeda a gudzai; man a lama na za, vodzok a shkè auda te pa.

³³ I woy a i sli dimèsh a Ndo nzi pèc pècèk a pats nshèffè ga tèlèba, i woy a i sla na dimèsh a Zhiklè ga, ha i metsi ga.

³⁴ Ma ga da ambaha. Iyè, i wuffè a géɗ Ndo nzi pèc pècèk.

³⁵ Ndohi malihai da ze ta tʼherkeda, a ndohi ambaɓihia da ndev ta! Ndav ga, slubordo Ndo nzi pèc pècèk! Alleluia!