Psaumes 102 - Ma Zhiklè

¹ Ntsi ri ndo mbelawa, man ndav nengaʼa a mʼmbeɗ na, a kuɗa na a Ndo nzi pèc pècèk.

² Ndo nzi pèc pècèk, tsena ntsi ri ga! Mbèhè ga da ndikè a sam ngaya!

³ Ka nghede va ngaya a sam ga ɓai, a pats man skwi mwuɗitpa a gayè. Fu zlembaɗ a ma ga; aman i tsi ri a ka, mbeɗkay a ma!

⁴ Pats nshèffè ga a ndiv na ara vodzok, vogwa a tay vatasl a va.

⁵ Ndav ga a lèyè, a gworyè, a ɓütyè ara kuza, nʼndi skwai a mpcèy a gèɗ.

⁶ I kuɗai a i shèkètè, a gworyè a hai hunjüɓaʼa.

⁷ I lèmèlèmè ara zhèrèu tʼhèshèkèɗ, ara wuzhèm te dikai.

⁸ I tèr nzhun azɓai, i kuɗai, ara diak man a nzi a géɗ gai, staɗ a géɗ na.

⁹ Mayamhi ga ta derɗyè pèc pècèk. Tengaʼa man ta gay shèwa kumba, ta mbaday va a gèɗ.

¹⁰ I ndi herkeda ara movar, i si kuɗa ga a va iyam nsai,

¹¹ a géɗ ndzoan ngaya, a géɗ man kagi ndav, aman ka cyè a ka kaldyè dra.

¹² Pats nshèffè ga a de na ara mèzhèɓ, man pats nkala ma. I gwora ara kuza.

¹³ Aman ka, Ndo nzi pèc pècèk, ka nzi a géɗ sam nʼnzi bai a mèdèp. Ndohi te verzi wud wuda ta hér ka a ma ma.

¹⁴ Ka da slèmbèɗè, Sion a da se ka te va. Tiɗè sama ma, patsa azhè aman ka va na pombai.

¹⁵ Kwa kokwar Sion ambaha ta ɓèlèlihi ngaya; ta kuɗi a géɗ nkulama nengaʼa.

¹⁶ Te deɓaʼa ndohi herkeda ta da gi zlau nzlembaɗ Ndo nzi pèc pècèk, a bihi herkeda tèlèba ta gi huyokokoʼa a sam nʼnjèl ngaya.

¹⁷ Aman Ndo nzi pèc pècèk a da rèm Sion zaʼa, a da ngrédè va na te nʼnjèl na,

¹⁸ a da tsena ntsi ri ndohi man ta helama taskwai, a nkwèl ntsi ri tengaʼa azɓai.

¹⁹ Ta da windèʼa, a ndohi a ma ma ta da jèngèʼa, a ndohi kokwar, man ta til mɓua dai, ta da slébèrdè Ndo nzi pèc pècèk.

²⁰ Aman Ndo nzi pèc pècèk a paka di a hai a herkeda te giɗfèk, te géɗèʼa a sam nengaʼa nkezlaʼa,

²¹ aman a tsena kuɗ ndohi te ɓèlè, aman a preka ta ndohi auda, man ta pe ta a ri a mʼmetsai;

²² a ndohi ta da slébèrdè nzlembaɗ Ndo nzi pèc pècèk, te Sion, a vaʼa, a ta shid gèɗ a nengaʼa te Jérusalem;

²³ aman ndohi herkeda ta da ɓicè va tèlèba a kokwar bihi ba, a ta gi mizlinè Ndo nzi pèc pècèk.

²⁴ Nengaʼa a ncèmay wuɗi auda te va a civèɗ ga, a ngelaha pats nshèffè ga.

²⁵ Anai i gaɗa: Zhiklè ga, ka cèmay nshèffè te gola ɓai! Mvi ngaya a dè a ma ma te verzi wud wuda.

²⁶ Tʼhinkaɗ na ka gau herkeda. Giɗfèk, ri ngaya a ngau.

²⁷ Ta da ndiv ta; aman ka, ka nza. Tengaʼa tèlèba ta hal ta ara maslaka. Ka da ngwèd ta ara maslaka, a ta zi ta.

²⁸ Aman ka, ka ngwèdè va azɓai, mvi ngaya a ndivè azɓai.

²⁹ Wudahi ɓèlèlihi ngaya ta da nzi dai, a ndohi te verzi tengaʼa ta nzi a sam di ngaya a ma ma.