Psaumes 10 - Ma Zhiklè

¹ Ndo nzi pèc pècèk, ka zlatsa dra èhèmè, ka ngheda va a pats matakwan èhèmè?

² Mbelaw ndo a gi zlau a sam ndo nfi va ambaɓiaʼa. Ma kilè tengaʼa da ngwoda ta va a gèɗ!

³ Aman ndo ambaɓiaʼa a fi va a gèɗ ntétékè nengaʼa. Ndo metsar a phömdè, a dérɗè Ndo nzi pèc pècèk.

⁴ Ndo ambaɓiaʼa a hér gèɗ nfi va, a gaɗa: kita azɓai, Zhiklè azɓai.

⁵ Mizlinè ndo ambaɓiaʼa tèlèba a gai. A sun kita ngaya ɓai, ka dra a sam na. A dérɗè mayamhi na tèlèba.

⁶ A nhur a gaɗa: I nza, ko a ma ma i da si matakwan azɓai.

⁷ Ma nengaʼa nʼndha a ndérɗè ndo, a ncèkèlma, a ma wuɗai. Skwi man ambaɓai, a malai, a shkè auda te ma na.

⁸ A zhirdè di te gai, a kéɗ ndo man nʼnga mal i ɓai, a sam man ndo a rka bai. A zeɓi ndo ntawassaʼa.

⁹ A pi va a sam nʼnghe-daʼa ara marizhèlè tʼhwaɗ wof, a zhèrèʼa aman a slaha a ngshè mbelaw ndo. A gshè mbelaw ndo a gadda.

¹⁰ A dè a deɓ tʼhai, a frekohai, ndo ntawassaʼa a kèlè a ri nengaʼa.

¹¹ A nhuro: Mpca na a gèɗ a Zhiklè; Zhiklè a nʼngheda va na, a rka ɓai.

¹² Ndo nzi pèc pècèk, Zhiklè ga, slambaɗa, zlatseda ri ngaya, ndohi mbelawa da pca ka a gèɗ ɓai!

¹³ Ndo man ambaɓai a dèrɗè Zhiklè, a hur a ngaɗa: a da gi kita azɓai, èhèmè.

¹⁴ Di ngaya a rkaʼa. Ka pi di a matakwan a kuɗa, a ka tilèʼa a ri ngaya. Ndo ntawassaʼa a va ka va nengaʼa a ri a ka; ka ndo ntakaha kra dikai.

¹⁵ Paslama na ri a ndo nderɗe Zhiklè a ndo man ambaɓai; da pela mali na, gèɗ va na da zeda.

¹⁶ Ndo nzi pèc pècèk a gi bai pèc pècèk a mèdèp. Ndohi nte deɓa ta ndev ta te kokwar nengaʼa.

¹⁷ Ndo nzi pèc pècèk, ka tsena ntsi ri ndohi man mpataka ngaya a keɗ ta. Ka pa ta a pa a ndav. Ka fi zlembaɗ,

¹⁸ a ka helka ta nda kra dikai a ndo man ta ga na wuɗai auda te kita. Ndo a gèɗ herkeda da pra ta zlau a va ndohi ngiɗè a ma ma asaɓai.