Proverbes 8 - Ma Zhiklè

¹ Maya a bèhè azɓi dè? Daʼai nshin skwai a slhè azɓi dè?

² A zlècèdè va a civèɗ man a géɗèʼa, a sam nkezli gèɗ civèɗ.

³ A zlècè a sam ncèmma, a bèhè a wuɗai tʼhwaɗ kokwar:

⁴ I njè ma a géɗ kinè, ngurhai! I bèhè a géɗ wud ndohai!

⁵ Kinè madaɗauhai, va-hur maya! Kinè nrzlahiaʼa, va-sundo maya!

⁶ Va-tsenaʼa! I da ngreda kinè skwi mbiaʼa; ma ga a gada kinè ma zuraʼa.

⁷ A vava, ma nzuraʼa a shkè auda te ma ga; nzli ma a te ma ga ɓai.

⁸ Ma ga tèlèba, ma nzuraʼa skwi nterɗaʼa, ambaɓiaʼa, a te pa ɓai.

⁹ Ndo man a hér maya a sun a ngaha amba tèlèba. Ndo man maya na zhè, a suna, zuraʼa tèlèba.

¹⁰ Skwi man i slebda kinè a fena sulai; dara maya a géɗ guro.

¹¹ Maya a fena sulai. Skwi mèshèlè tèlèba a lèmdè va a vna azɓai.

¹² Iyè — maya — i nza a maya; i sun ngi skwi a i hér skwi a maya maya.

¹³ Ndo man a gada i gi zlau Ndo nzi pèc pècèk, a gi shèwa a skwi man ambaɓai. Skwi haha i gi shèwa a vna: nfi va, njégèr va, ngi skwi man ambaɓai, ncèkèlma.

¹⁴ I sun ngredè maya, i hér skwi man a ma, i sun skwai, wudi ga a zhè.

¹⁵ Bihi ta gi bi a iyè; ndohi kita ta bèzlè kita a iyè.

¹⁶ Wud bihai a mbibihiaʼa a ndohi kita a gèɗ herkeda tèlèba ta gi mizlinè ta a iyè.

¹⁷ Ndo man a woy iyè, i ba i woyaʼa; ndo man a hassyè, a da ngatsyè.

¹⁸ Skwi mèshèlè a nʼnjèlè a zhè a sam ga; skwi mèshèlè man a gédèshè azɓai, a ngi-zuraʼa.

¹⁹ Skwi man a shkè auda te iyè a fena guro, guro ndaɓalaʼa; skwi man i ckoɗauda a fena sulai.

²⁰ I dè a civèɗ ngi-zuraʼa, man a dè te ndev skwi nzuraʼa.

²¹ A i va ta skwi a ndohi man ta woy iyè, a i ndha ta gozhèm.

²² Ndo nzi pèc pècèk a ngiyè, i skwi nengaʼa nshèlèkuraʼa tʼhin na, ga a gi skwi nengaʼa ngiɗè.

²³ A giyè tʼhinèkaɗ na, te nhinèkaɗ skwai, ga herkeda a zhè.

²⁴ Ga iyam mbiaʼa a zhè, i ga ma; ga nlèlè iyam a zhè, a iyam kumba.

²⁵ Ga za a ɗizlè, ga ngègèɗhai, i ga ma.

²⁶ Aman herkeda nʼnga di ɓai, gi dau az di ɓai, mberfenèk az di ɓai, i zhè ar iyè ma.

²⁷ Aman Zhiklè a ngu giɗfèk, i zhè a pa; aman a nkezla giɗfèk a herkeda;

²⁸ aman a gu vani a giɗfèk, a iyam a hakaɗauda te vèvèɗ;

²⁹ aman a ngu dzah woyam, a iyam a da hi auda a dzah azɓai; aman a ɗizl herkeda,

³⁰ i zhè a tsagi nengaʼa, nga a vna, a nengaʼa a wuffè a géɗ ga pèc pècèk, a i gècè a sam na.

³¹ I mbèhwali a géɗ herkeda, a i wuffè a géɗ wud ndohai.

³² Anai, wudahi ga, va-tsena ma ga! Mwuffè a sam ndo man a jèjèr civèɗ ga.

³³ Va-tsena njè-ma ga, aman kin ngècè maya, kin kwola ɓai!

³⁴ Mwuffè a sam ndo man a tsena ma ga, man a zlècè a ntamagi ga pèc pècèk, a ɓer ntamagi ga.

³⁵ Ndo man a ngatsyè, a nʼngots nshèffè, a ngècè pombai a sam Ndo nzi pèc pècèk.

³⁶ Aman ndo man a nciyè ɓai, a zeda nshèffè na. Ko wawa man a gi shèwa a iyè, mʼmetsi ambaha.