Proverbes 7 - Ma Zhiklè

¹ Kra ga, ɓüro ma ga, dzodzor ma nkwèr ga!

² Büro ma nkwèr ga, a ka nzi a nshèffè! ɓüro njè-ma ga ara tser di ngaya.

³ Pizlèda hwaɗ ri ngaya, gsa te ndav ngaya!

⁴ Gaɗa na ma maya: Ka demam ga! Baha na nshin skwai: Ka dem géɗ godom ga!

⁵ A da ɓer ka te ri ngwoz ndo ngiɗè, te ri ngwoz mphomaʼa man a gèɗ ma ara vongwom.

⁶ A ntamagi ga i zhirdè di a ri vèzlèɗ.

⁷ A rka te va golahi gol ngiɗè staɗ man a hér skwi ngiɗè azɓai, deɓi ndo,

⁸ man a beza a civèɗ a dalmagi nengaʼa.

⁹ Sam retökwaʼa, a dakwaɗ, sam a woya a nké-zhèw ma.

¹⁰ Na haha, ngwoz a haka na ma, man hori az a di ɓai, ara fali dam,

¹¹ ambaha na walai, a wosla na va a dai, a njidè verzi a hi azɓai.

¹² Na ahngata a civèɗ – na ahngata a luma – na ahngata a zhirdè di a dergai.

¹³ A gshèʼa, a kelawa na ri a daʼai, a pa na kocèkocè a ma.

¹⁴ I do a i va na skwi a Zhiklè ma, ar na. A patsna i gau ara man i gadda skwi a hai.

¹⁵ Gar haha i shkè aman nga zli gèɗ a ka, aman i has ka, anai i ngats ka ma.

¹⁶ Sam mʼmènè ga ntila ma, maslaka mbelaʼa ntila a pa ma,

¹⁷ i guceda ɓurdi a pa ma, ɓurdi myrrhe a aloès a cinnamone.

¹⁸ Washkè, nga mana a ka, ha ndidèk sam ba, a nga ngeza wushèk ba, nga gsa te pa dzeɓaʼa!

¹⁹ Baki ga a te ngwi ɓai, kala nshèwèlè dra,

²⁰ nhelda skwi a rai, a da shkè ngwai sèi a ki ngiɗè.

²¹ A nengaʼa a ruɓdahi a ma na, a ngèzlèa a ngèɗè nengaʼa man a jenaha ara vongwom.

²² A jèjèrèʼa, a hér skwi ngiɗè azɓai, ara zlè man ta da kéɗèʼa, ara tambak man ta dzawaʼa,

²³ ara ɗiak man votok a verzai, a suna a ngaɗa nshèffè ga a da zi na ɓai, ha sulom a dza na a verzi hwaɗ.

²⁴ Anai, kra ga, tsena ma ga, fu zlembaɗ a ma man i gada ka.

²⁵ Ka ngalda ndav ngaya a civèɗ nengaʼa ɓai, ka zlak ngaya a civèɗ nengaʼa ɓai!

²⁶ Ta kumba man a ga ta arsa, a kalde ta a hi arsa, ngur ndohi kumba man ta bazl ta a sam na.

²⁷ Gi nengaʼa, civèɗ ndè a sam mʼmetsai, man a dè a vèvèɗ dau.